Ministrja e Drejtësisë, Etilda Gjonaj, ka njoftuar ringritjen e Komisionit të Ekzekutimit të vendimeve penale.
I njejti komision do të shërbejë për rritjen e transparencës dhe koordinimin e të gjitha institucioneve që ndjekin ekzekutimin e vendimeve penale.
Ministrja Gjonaj, në njoftimin e saj shton se komisioni shërben si një mekanizëm kombëtar për trajtimin e ankesave, kryerjen e verifikimeve të nevojshme, monitorimin e punës së IEVP-ve dhe çdo problematike në to, duke trajtuar me përparësi çdo çështje dhe informuar Ministrin e Drejtësisë.
Ajo shpjegon se roli i Komisionit është mjaft i rëndësishëm në aspektin procedurial të ekzekutimit të vendimeve penale, në bashkërendimin e punës për politikat penitenciare dhe zbatimin e tyre me organizmat monitorues si Komiteti i Parandalimit të Torturës, Avokati i Popullit etj.
Komisioni i pavarur nga Ministria e Drejtësisë ka përfaqësues të Kryeministrit, Kuvendit, Presidencës, Prokurorisë së Përgjithshme, Dhomës së Avokatisë dhe ministrive përgjegjëse për drejtësinë, arsimin, financat e shëndetësinë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
