Nga fuqizimi i Berishës te takimi me Alibeajn dhe kritikat ndaj Kim/ Flet zyrtarja e lartë e DASH

Ndihmës Sekretarja amerikane e Shtetit për Çështjet Europiane dhe Euroaziatike Karen Donfried, ka folur për Zërin e Amerikës lidhur me takimet e zhvilluara së fundmi në Tiranë. Duke u ndalur te rasti Berisha, Donfried tha se si zyrtare e SHBA s’mund të takohej me një politikan të shpallur non grata.

Sekretari Blinken e shpalli Z. Berisha për shkak të akteve të korrupsionit ku ishte përfshirë dhe unë, si zyrtare e qeverisë së SHBA, nuk mund të takohem me persona të shpallur. Besoj që pozicioni i SHBA është shumë i qartë. Në fakt u takova sot me drejtues të opozitës dhe do të ndaj me ju faktin që më bëri përshtypje se sa shumë biseda jonë u përqendrua jo tek e kaluara por tek e ardhmja dhe se çfarë PD kërkon të arrijë dhe pret për sa i përket çuarjes përpara të objektivave të Shqipërisë”.

E pyetur me çfarë kapaciteti i takoi Alibeajn, Tabakun dhe Bardhin, ndërsa nuk njihen nga Berisha si drejtues në PD, Donfried tha:

U takova me ta në cilësinë time si Ndihmës Sekretare e Shtetit për Çështje të Europës dhe Euroazisë dhe në cilësinë e tyre si drejtues të Partisë Demokratike. Dhe është diçka shumë e zakonshme kur udhëtoj që të takohem si me anëtarë të qeverisë ashtu edhe me anëtarë të opozitës”.

E pyetur mbi kritikat ndaj Yuri Kim, Ndihmës Sekretarja tha se Joe Biden dhe sekretari Blinken kanë besim te ambasadorja amerikane në Shqipëri.

Mund t’ju siguroj që Presidenti i Shteteve të Bashkuara Joe Biden, Sekretari i Shtetit i Shteteve të Bashkuara Tony Blinken dhe unë, të gjithë kemi besim të plotë tek Ambasadorja Yuri Kim. Dhe është një kënaqësi e madhe që kemi njerëz të kalibrit të saj dhe me integritetin e saj në qeverinë e SHBA-së. Dhe mendoj që edhe ky vend, Shqipëria, nuk mund të kishte më shumë fat se sa të ketë atë si përfaqësuese të vendit tim dhe duke punuar çdo ditë për të forcuar atë që është tashmë një marrëdhënie e rëndësishme midis Shteteve të Bashkuara dhe Shqipërisë.