“Me Ramën kryeministër, dyert e BE-së të mbyllura për Shqipërinë”

Kreu i Partisë Demokratike, Lulzim Basha, i është përgjigjur deklaratave të kryeministrit Edi Rama se ligji i Vettingut është kushti i vetëm për datën e negociatave me BE-në. Kryeopozitari thotë se fshehja dhe manipulimi i realitetit vetëm e përkeqëson situate dhe se me Ramën kryeministër dyert e Bashkimit Europian do të jenë të mbyllura për Shqipërinë.

Në një postim në rrjetin social “Facebook” Basha thekson se zgjidhja e çdo problemi fillon me njohjen dhe pranimin e problemit, fshehja dhe manipulimi i realitetit vetëm e përkeqëson atë.

“Prej muajsh kreu i qeverisë po zbaton një fushatë të gjerë për të fshehur realitetin e rrezikshëm të krimit të organizuar, prodhimit dhe trafikimit të drogës dhe të kapjes së shtetit nga krimi.
Akoma më keq, Rama po përpiqet me çdo mjet dhe shërbëtor të tij të fshehë faktin se lufta kundër korrupsionit, krimit e drogës dhe zgjedhjet e lira janë kushte kyçe që Bashkimi Europian i ka vendosur Shqipërisë për hapjen e negociatave”, shkeuan Basha.

Sipas kreut të opozitës nga manipulimi i realitetit përfitojnë vetëm kriminelët, trafikantët, të korruptuarit dhe Edi Rama.

“Qëndrimet e Kryeministrit janë mesazh i qartë inkurajues për kriminelët që të vazhdojnë të patrazuar pasi shteti nuk e ka prioritet luftën kundër tyre. Të vazhdojnë të qetë se Edi Rama nuk do thotë kurrë një fjalë të keqe për ta. Kështu ai jo vetëm po e inkurajon krimin duke e fshehur atë por po e mbron me veprime konkrete. Veprimet e Edi Ramës dhe pushtetarëve të tij i dhanë lirinë një krimineli si Lulzim Berisha. Mosveprimet e Edi Ramës kanë lënë jashtë burgut Klement Balilaj dhe po mbajnë në pushtet një kriminel si Elvis Rroshi. Mbështetja e Edi Ramës po i mban kriminelët në politikë”, vazhdon me tej Basha.

Kryetari democrat vazhdon të akuzoj kryeministrin Edi Rama se, pasi e ka kthyer Shqipërinë në pronë të kriminelëve dhe jo e njerëzve të thjeshtë. Dhe sipas tij me Edi Ramën dyer e Bashkimit Europian do të mbeten të mbyllura për Shqipërinë.