Fill pas vendimit të Gjykatës së Apelit e cila dënoi me një vit burg deputetin e PD-së, Ervin Salianjin, ka reaguar edhe kreu i Partisë Demokratike, Sali Berisha.
Në daljen e tij të përnatshme para simpatizantëve, Berisha tha se Salianjin e dënuan me 1 vit burg sepse guxoi të përballej dhëmb për dhëmb me klanin më të fuqishëm të drogës të Vlorës, Geron dhe Fatmir Xhafën.
Ai shtoi se Salianji sot u dënua në një akt shpallje lufte ndaj opozitës shqiptare nga Edi Rama me akuzën e kallëzimit të rremë.
Një përshëndetje dhe solidaritetin më të madh për deputetin Ervin Salianji, të cilin sot Edi Rama, Geron Xhafa, Fatzi Xhafa e dënuan me 1 vit burg sepse guxoi të përballej dhëmb për dhëmb, pa u tutur, me guxim qytetar me krimin, me klanin më të fuqishëm të drogës të Vlorës, Geron dhe Fatmir Xhafën.
Sot, Geron Xhafa, ky trafikant ndërkombëtar droge, i dënuar në Itali, me gjykim në Venezuelë, feston fitoren e tij mbi denoncuesin publik, deputetin e opozitës, Ervin Salianji.
Ervin Salianji sot u dënua në një akt shpallje lufte opozitës shqiptare nga Edi Rama me akuzën e kallëzimit të rremë.
Është rasti i parë në historinë e Shqipërisë që një njeri dënohet për kallëzim të rremë.
Është rasti i parë në historinë e botës që një kallëzim i vërtetë, shpallet kallëzim i rremë.
Ervin Salianji u arrestua sot sepse provoi me zë dhe dokumente se Geroni, ky baron droge, ky kriminel i pashpirt, drejtonte trafiqet nga porti i Vlorës, ndërkohë kur kërkohej për të bërë burgun në Itali për krimet që kishte kryer në këtë vend.
Berisha më tej, bëri thirrje që të nisin betejën për ekzistencën e opozitës, nën thirrjen ‘Ja të vdesim, ja të rrojmë për liri!’.
Goditja me proces politik e Ervin Salianjit është një akt i shëmtuar, një hakmarrje e verbër politike e Edi Ramës dhe Fatmir Xhafës.
Është një kushtrim për çdo opozitar, që konsideron krimin, konsideron drogën si rrezik madhor për qenien e tij, ekzistencën e tij.
Për ligjet, për rendin, Kushtetutën dhe vendin.
Kjo goditje, në serinë e goditjeve të opozitës, të arrestimeve dhe burgosjeve politike, është një kushtrim, është një apel për të gjithë opozitën, të ngrihet në këmbë o sot o kurrë.
Ndaj dhe sonte, u bëj thirrje shqiptarëve kudo që janë, opozitarëve kudo që janë, të ngrihemi dhëmb për dhëmb me këta kriminelë.
Të lëmë mënjanë gjithçka, të nisim betejën për ekzistencën e opozitës, betejën për ekzistencën e ligjit, betejën për fitoren mbi krimin, betejën për përmbysjen e narkokrimit, betejën për Kushtetutën e vendit, betejën për sovranitetin e Shqipërisë.
Betejën për një drejtësi të pavarur.
Betejën kundër mafies të çdo ngjyre, me guxim, me trimëri.
Ja të vdesim, ja të rrojmë për liri.
Demokrate e demokratë, kush ndjehet sot demokrate e demokrat, kush ndjehet sot opozitare e opozitar, t’i bëjë thirrje guximit të tij.
Të dalim në shesh të mejdanit, të përballemi, të fitojmë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
