Deputetja demokrate Jorida Tabaku rendit arsyet kryesore të rritjes së çmimeve të karburanteve në një shkrim me titull “Përballë një marrëveshjeje të pandershme të korrupsionit!”
Tabaku thotë se në sesionin e kaluar, Grupi Parlamentar i Partisë Demokratike shënoi një fitore duke mbyllur bordet e naftës dhe duke luftuar kundër oligarkisë së naftës që ka dominuar për shumë vite.
Arsyet se pse ende ndihemi nën hijen e çmimeve të larta të karburantit, deputetja opozitare i rendit me tre pika:
1. Kartelat e Krijuara: Oligarkia e naftës ende e dominon lojën e tregut dhe ka krijuar një fushëveprim të ndërlidhur të interesave të saj. Këto kartele shmangin ligjet dhe vendosin çmimet sipas dëshirës së tyre.
2. Taksimi socialist: Detyrim për Ju, Fitim për Të Tjerët (Oligarkët): Qeveria dhe oligarkia punojnë së bashku në një ortakëri të mjerueshme.
Ndërkohë që ju shihni çmimin e naftës rritur, më shumë se gjysma e çmimit është e justifikuar me taksa të larta që merren nga xhepat tuaj. Thënë shkurt, keni të bëni me një marrëveshje që e shfrytëzon juve për të pasuruar ata.
3. Shfrytëzimi i Kursit të Këmbimit: Edhe pse transaksionet për naftën bëhen në dollarë, çmimi rritet në monedhën tuaj lokale. Ky truk shfrytëzohet për të fituar edhe më shumë.
Kompanitë e oligarkisë përfitojnë nga rritja e çmimit dhe kursi i këmbimit, duke u dhënë mundësinë për të fituar dy herë më shumë.
Sipas saj, këto arsye janë shqetësuese dhe po e kthejnë ekonominë tonë në një kurth, duke na privuar nga konkurrenca e ndershme dhe e drejtë në treg, ku vetëm disa të pasur po përfitojnë, ndërsa shumica e pëson.
Tabaku thotë se gara e tregu i lirë është zgjidhja, konkurrenca e meritokracia, eliminimi i barrierave e rritja e numrit të kompanive dhe politika fiskale në shërbim të sipërmarrjes.
Përqendrimi vetëm në pak duar e ka ngushtuar hapësirën e kompanive për të vepruar. Rikthimi i besimit te institucionet, rigjallërimi i ekonomisë dhe hapja janë zgjidhja qoftë në biznes e qoftë në politikë.
Sot pak duar kanë kapur prej fyti shumicën, meritokracia nuk vlerësohet e ne duhet ta ndryshojmë këtë! Ta ndryshojmë kënetën politike e ekonomike për të shkuar përpara dhe ndryshuar realitetin!
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
