Meta mbështet qëndrimin e BE-së për të mos njohur zgjedhjet në Bjellorusi

Presidenti Ilir Meta të mërkurën ka mbështetur qëndrimin e Bashkimit Europian për të mos njohur zgjedhjet në Bjellorusi.

Në reagimin e tij, Meta thekson se qytetarët e Bjellorusisë meritojnë të jenë pjesë e një vendi demokratik me zgjedhje të lira dhe të ndershme.

“Mbështes qëndrimin e Bashkimit Europian për të mos njohur zgjedhjet presidenciale në Bjellorusi. Qytetarët e Bjellorusisë, ashtu si në të gjitha vendet nën regjim autokratik, meritojnë sa më parë të shprehin verdiktin e tyre përmes zgjedhjeve të lira dhe të ndershme, që janë kolona vertebrore e çdo sistemi demokratik", deklaroi Presidenti.

Në kryeqytetin bjellorus dhe në qytete të tjera, qytetarët kanë zhvilluar protesta masive, duke kërkuar zgjedhje të reja.

Ndërkohë që Presidenti i Bjellorusisë, Aleksandër Lukashenko ka deklaruar se vendi do të ketë zgjedhje të reja "vetëm nëse më vrisni mua."

Bashkimi Europian të mërkurën ka marrë vendimin për të mos i njohur zgjedhjet presidenciale të mbajtura në Bjellorusi më 9 gusht, pasi e konsideron procesin si jo të lirë dhe të rregullt.