Blerim Reka, Gordana Siljanovska dhe Stevo Pendarovski, të tre kandidatë potencial për president të Republikës së Maqedonisë së Veriut, kanë nëshkruar kodeksin e përbashkët, me zotimin për një fushatë demokratike dhe të drejtë.
Fillimi zyrtar i fushatës elektorale për zgjedhjet presidenciale, e gjen kandidatin shqiptar Blerim Reka, si kandidat të pavarur, e të mbështetur nga opozita Aleanca& Besa:“Unë shpresoj se do të jetë një garë e drejtë, ligjore dhe e rregullt, fundja nuk është aq me rëndësi se kush fiton por me rëndësi është që Republika e Maqedonisë së Veriut do të fitojë, dhe të fitoj datën për fillimin e negociatave për anëtarësim në BE”, deklaroi Blerim Reka.
Nga ana e saj, kandidatja e VMRO-DPMNE-së për Presidente, Gordana Siljanovska, u shpreh se bashkëpjesëmarrësit në zgjedhje nuk i shih si armiq, dhe se sipas saj, “Edhe pse jam grua, pres një betejë kalorësish me argumente e jo me lojëra bizantinësh. Mendoj se fjalën e fundit do e kenë qytetarët” u shpreh ajo.
Edhe kandidati i LSDM-së për President, Stevo Pendarovski, u zotua se nënshkrimi i kodit të përbashkët për zgjedhje të drejta dhe demokratike, do të zbatohet praktikisht në terren.
Sipas radhitjes, kandidati i pavarur i mbështetur nga opozita shqiptare Blerim Reka do të kryesojë fletëvotimin, numri dy i takon kandidates së VMRO-DPMNE-së Gordana Siljanovska ndërsa numër tre është kandidati i LSDM-së dhe koalicionit, Stevo Pendarovski.
Fushata zgjedhore për zgjedhjet presidenciale në Republikën e Maqedonisë së Veriut, fillon sot, ndërsa zgjedhjet do të mbahen më 21 prill. Të drejtë vote kanë rreth 1.8 milion qytetarë të kësaj republike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
