Shqipëria hap ambasadë në Azerbajxhan

Shqipëria hap ambasadë në shtetin e Azerbajxhanit, vendim ky i miratuar në mbledhjen e ditës së sotme të Këshillit të Ministrave.

Selia e ambasadës shqiptare do të jetë në kryeqytetin azer, Baku dhe shpenzimet për këtë mision diplomatik do të mbulohen nga Ministria për Punët e Jashtme.

VENDIM PËR HAPJEN E MISIONIT DIPLOMATIK TË REPUBLIKËS SË SHQIPËRISË NË AZERBAJXHAN

Në mbështetje të nenit 100 të Kushtetutës dhe të pikës 1, të nenit 21, të ligjit nr.23/2015, “Për shërbimin e jashtëm të Republikës së Shqipërisë”, me propozimin e ministrit për Evropën dhe Punët e Jashtme, Këshilli i Ministrave

VENDOSI:

1. Hapjen e misionit diplomatik “Ambasadë” të Republikës së Shqipërisë në kryeqytetin e Azerbajxhanit, Baku.

2. Shpenzimet për hapjen e këtij misioni diplomatik do të përballohen nga buxheti i Ministrisë për Evropën dhe Punët e Jashtme, për vitin 2023.

3. Ngarkohet Ministria e për Evropën dhe Punët e Jashtme për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.