Ministrja për Evropën dhe Punët e Jashtme, Olta Xhaçka, e pranishme sot në Konferencën e parë Ndërkombëtare organizuar në kuadër të Forumit të Prespës për Dialog, që u mbajt në Ohër të Maqedonisë së Veriut, bëri një përmbledhje të situatës lidhur me të drejtat e grave dhe përfshirjen e tyre në jetën publike.
Ajo sugjeroi hapa të rëndësishëm për sigurimin e objektivave të kësaj agjende.
“Si një anëtare e zgjedhur e Këshillit të Sigurimit, Shqipëria synon të kontribuojë në ruajtjen dhe forcimin e rendit shumëpalësh të bazuar në adresimin e sfidave globale dhe promovimin e paqes dhe sigurisë”.
Sipas ministres Xhaçka, një nga përparësitë gjatë mandatit dy vjeçar, janë të drejtat e grave e vajzave.
“Jemi të bindur se ndërtimi dhe ruajtja e paqes është e mundur vetëm kur gratë janë të përfshira. Ne besojmë fuqimisht se të drejtat e grave dhe zërat e tyre janë thelbësore për të drejtat e njeriut, demokracinë, sigurinë dhe prosperitetin”, u shpreh ministrja në fjalën e saj.
Më herët ministri i Punëve të Jashtme i Maqedonisë së Veriut, Bujar Osmani, e inicioi nisjen e platformës joformale për bashkëpunim politik- Ballkani 6 (B6), në format të Ministrave për Punë të Jashtme, me qëllim thellimin e bashkëpunimit dhe lidhjet mes vendeve nga rajoni në fushat e interesit të përbashkët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
