Meta uron Pavarësinë nga qelia: Të bashkohemi kundër çdo pushtuesi të vjetër apo të ri

Nga qelia e burgut ku ndodhet prej më se një muaji, kryetari i Partisë së Lirisë, Ilir Meta ka uruar ditën e Pavarësisë së Shqipërisë.

Ai thotë se 112-vjetori i Pavarësisë i fton të gjithë të bashkohen në mbrojtje të idealit të lirisë, vlerave, identitetit dhe çështjes kombëtare, të sovranitetit dhe integritetit territorial kundër çdo pushtuesi dhe kolonizatori të vjetër apo të ri.

Gëzuar Ditën e Flamurit Kombëtar! Urime të gjithë shqiptarëve kudo janë 28 Nëntorin e Gjergj Kastrioti Skënderbeut, Ismail Qemalit, Isa Boletinit dhe Adem Jasharit!

Kremtimi i 112-vjetorit të Pavarësisë së Shqipërisë na fton të gjithëve të bashkohemi në mbrojtje të idealit të Lirisë, vlerave, identitetit dhe çështjes kombëtare, të Sovranitetit dhe integritetit territorial kundër çdo pushtuesi dhe kolonizatori të vjetër apo të ri, në mënyrë që Flamuri Kuqezi me shqiponjën dykrenare, simboli ynë i shenjtë dhe përbashkues, të valëvitet krenar në këto troje, i pastër dhe i pacenuar, njësoj si gjaku i derdhur për të, nga bijat dhe bijtë më të mirë të kombit.

Të dëshmojmë vendosmërinë e palëkundur, mençurinë dhe patriotizmin më të lartë për mbrojtjen e këtyre idealeve e vlerave, si dhe në përmbushjen pa vonesë të aspiratës popullore dhe misionit të nisur në 28 nëntor 1912, nga Ismail Bej Vlora dhe gjithë etërit e Pavarësisë, për ta bërë Shqipërinë si gjithë Europa. Zoti e bekoftë Flamurin Kombëtar!

Zoti i bekoftë shqiptarët kudo që ata ndodhen!