Incidenti me armë/ Përjashtohen dy kandidatët e primareve në Kurbin

Dy kandidatët e Partisë Demokratike në primaret e Kurbinit, Edmon Shkoza dhe Alfred Dajçi janë përjashtuar nga zgjedhjet brenda partisë.

Kështu ka njoftuar Komisioni i Organizimit dhe Kontrollit të Operacioneve Elektronike.

Kjo pasi në selinë blu në Kurbin, para pak ditësh ndodhi një incident që përfundoi në të shtëna arme.

Gjithashtu Komisioni i Organizimit dhe Kontrollit të Operacioneve Elektorale i kërkon kryesisë së PD-së Kurbin marrjen e masave disiplinore me shkarkim nga çdo funksion në këtë parti të shtetasit Van Rica.

KOKOE mori në analizë ngjarjet e rënda të ndodhura gjatë procesit zgjedhor për Primare në PD Dega Kurbin në datat 28 dhe 29 nëntor 2022 të cilat kanë sjellë vështirësi serioze në respektimin e procedurave të afateve të përcaktuara në vendimin e Këshillit Kombëtar nr.38 datë 1.10.2022 si dhe udhëzimeve të KOKOE.

 Pas shqyrtimit të fakteve, fotove, videove dhe dëshmive, KOKOE arrin në konkluzion që:

 -aktet e dhunës në PD janë të papranueshme e të patolerueshme

-me veprimet e tyre kandidatët në garë dhe anëtarë të kryesisë së PD kanë cënuar rëndë ecurinë e procesit zgjedhor të primareve.

 Komisioni për Organizimin dhe Kontrollin e Operacioneve Elektronike vendosi:

 -Përjashtimin nga gara e Primareve në PD Kurbin të z.Alfred Dajçi për incidentin në ambientet e zyrës së PD Kurbin dhe z.Edmond Shkozapër incidentin e ndodur brenda dhe jashtë ambienteve të zyrës së PD Kurbin.

 -KOKOE i rekomandon Kryesisë së PD dega Kurbin marrjen e masës disiplinore me shkarkimin nga çdo funksion në PD të z. Vani Rica.

Më 28 nëntor një konflikt ka ndodhur në zyrat e PD –së Kurbin, gjatë një takimi formal për zgjedhjet për kryetar në këtë qytet.

 Konflikti fillimisht ka nisur mes nënkryetarit të PD Kastriot Marku dhe një anëtari të kësaj force politike. Anëtari i PD, Van Rica ka shtënë me armë  dhe më pas është larguar në drejtim të paditur.