“Nuk përmbushi detyrat”, Bizhga pezullon nga detyra zyrtarin e Departamentit të Teknologjisë

Drejtori i Përgjithshëm i Policisë së Shtetit, Sokol Bizhga, pezullon nga detyra Ulian Shpatarakun, me funksion Asistent në Departamentin për Teknologjinë e Informacionit në Policinë e Shtetit. 

Pezullimi i tij është marrë për moszbatim të hapur të dispozitave ligjore në përmbushjen e detyrave funksionale. 

Mësohet se Shpataraku është aktualisht duke ndjekur studimet master në Akademia e Sigurisë, por dyshohet se, me argumentin e vijimit të studimeve, nuk paraqitej rregullisht në punë.

Për këtë, ka ekzistuar një urdhër i qartë nga Drejtori i Përgjithshëm që studimet master të ndiqen jashtë orarit zyrtar të punës, çka sipas policisë përbën shkelje në rast të mosrespektimit.