Dita e Ribashkimit të Gjermanisë/ Nikolla: Mirënjohës për mbështetjen në integrimin evroatlantik të Shqipërisë

Me rastin e 3 tetorit, Ditës së Ribashkimit të Gjermanisë, kryetarja e Kuvendit, Lindita Nikolla përcolli mesazh urimi.

Në mesazhin e saj, Nikolla shprehu mirënjohjen për mbështetjen e Gjermanisë për zhvillimin, demokratizimin dhe integrimin evroatlantik të Shqipërisë.

Sot populli gjerman feston Ditën e Ribashkimit. Pas 41 vjet ndarjeje, me rrëzimin e Murit të Berlinit, kombi gjerman u bashkua dhe “rrëzoi” edhe ”muret” e tjerë ndarës.

Pas tre dekadash, Gjermania u rrit  e u zhvillua dhe sot është bërë lokomotiva ekonomike dhe politike e Evropës. Ribashkimi i Gjermanisë përshpejtoi ritmet e ndryshimit dhe demokratizimit të vendeve të Evropës Qendrore e Lindore. Gjermania është ndër mbështetëset më të fuqishme të zhvillimit, demokratizimit dhe integrimit evroatlantik të Shqipërisë.

Ne, shqiptarët, i jemi gjithashtu mirënjohës Gjermanisë për mbështetjen e pavarësisë, zhvillimit, rritjes së njohjeve ndërkombëtare dhe integrimit evroatlantik të Kosovës. Gëzuar Gjermani!.