Pas një seance maratonë, Kuvendi i Kosovës arriti të ratifikojë marrëveshjen e demarkacionit të kufirit me Malin e Zi. Me 80 vota pro, 11 kundër dhe asnjë abstenim, deputetët e Kuvendit i dhanë dritën jeshile kësaj marrëveshje.
Pas këtij ratifikimi nuk kanë munguar as urimet nga Tirana zyrtare, ku i pari ishte kryeministri Edi Rama që përshëndeti vendimin e Kuvendit të Kosovës për të miratuar demarkacionin me Malin e Zi dhe thekson se ky akt është dëshmi e seriozitetit të Kosovës si shtet.
"Super Vota për demarkacionin një votë e vonuar, por kuptimplotë për Kosovën si shtet që dëshmon seriozitet në angazhimet e veta. Tani Bashkimi Evropian t’i përmbahet pa vonesë angazhimit të vet: Liri lëvizjeje pa viza në Evropë për qytetarët e Kosovës", shkruan Rama.
Përmes një reagimi zyrtar, Meta e cilëson votimin e ditës së sotme, si një përmbushje e dëshirës së qytetarëve të Kosovës për të lëvizur të lirë e për realizimin e aspiratës së tyre të integrimit ne Bashkimin Evropian.
“Përgëzime për Kuvendin e Kosovës per miratimin e marreveshjes se demarkacionit me Malin e Zi dhe urime te gjithe qytetareve te Kosoves ne permbushjen e deshires se tyre per te levizur te lire e per realizimin e aspirates se tyre te integrimit ne Bashkimin Evropian!”, shprehet Meta.
Ai e ka konsideruar këtë vendim një hap përpara drejt liberalizimit të vizave me vendet e BE-së.
“Përcaktimi i vijës kufitare mes Kosovës dhe Malit të Zi përbën një hap të rëndësishëm përpara në zgjidhjen e mosmarrëveshjeve ndërkufitare, i krijon mundësinë Bashkimit Europian për të vijuar sa më parë me procesin e shumë dëshiruar të liberalizimit të vizave për qytetarët e Kosovës dhe përforcon klimën e bashkëpunimit pozitiv në tejkalimin e mosmarrëveshjeve mes fqinjëve. Urime Kosova”, shkruan Bushati.
Edhe kreu i PD, Lulzim Basha përshëndeti votimin e demarkacionit në Kuvendin e Kosovës. Kryedemokrati thekson se ky akt është një kontribut thelbësor në marrëdhëniet e fqinjësisë së mirë dhe stabilitetit në rajon.
"Partia Demokratike fuqimisht beson se ky akt eshte nje hap i sigurte i Kosoves drejt proceseve integruese. Ky votim eshte nje lajm i mire per Kosoven dhe miqte e saj. Partia Demokratike si ne cdo ore te historise se saj mbeshtet me ndjenje vellazerore dhe ne respekt te institucioneve te Kosoves cdo hap drejt integrimit euro-atlantik, konsolidimit te shtetit dhe mireqenies se popullit te Republikes se Kosoves", shkruan Basha në rrjetin social "Facebook".
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
