Situata e rëndë epidemiologjike me Covid-19 në Kosovë, është shkaku, sipas së cilës, kryetari i Aleancës për Ardhmërinë e Kosovës, Ramush Haradinaj, do të çoj në shkurtimin e fushatës zgjedhore të partisë së tij.
Haradinaj, ka njoftuar se nesër në nismë të fushatës zgjedhor, subjekti të cilën ai e drejton, ka vendosur që fushatën për zgjedhjet lokale të 17 tetorit, ta kufizojë në vetëm pesë ditë para elektoratit të tij.
Sipas tij, AAK-ja fushatën pesë ditore do ta zhvillojë në përputhje të plotë me kriteret dhe rekomandimet e Institutit Kombëtarë të Shëndetësisë Publike.
Ai madje ka bërë të ditur se partia të cilën ai e drejton do të gjejë mënyra alternative të komunikimit për të shpalosur programin zgjedhor.
“Duke pasur parasysh situatën e rëndë epidemiologjike me Covid-19, Aleanca për Ardhmërinë e Kosovës, ka vendosur që Fushatën konvencionale për zgjedhjet lokale Tetor 2021, ta kufizojë në 5 ditë. Të nderuar qytetarë, struktura e simpatizantë të AAK-së, do të përpiqemi që duke filluar nga nesër, të gjejmë mënyra alternative të komunikimit dhe të shpalosim programin dhe objektivat tona për zgjedhjet e 17 Tetorit. Gjatë kësaj kohe do ta zbatojmë modelin e fushatës digjitale”, ka shkruar Haradinaj në Facebook.
Ndryshe, kreu i Lidhjes Demokratike të Kosovës, Lumir Abdixhiku, iu pati bërë thirrje partive politike për pajtim rreth çështjes së shkurtimit të fushatës zgjedhore.
Presidentja e Kosovës, Vjosa Osmani, kishte ftuar të hënën në takim të gjithë krerët e partive politike në Kosovë për të diskutuar për mundësin e shtyrjes së zgjedhjeve, por duket se aty nuk pati pajtim për shtyrje të datës së zgjedhjeve të 17 tetorit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
