Kryetari i bashkisë së Tiranës, Erion Veliaj deklaroi ditë më parë se nuk ishte ai që kishte kërkuar ndërtimin e inceneratorit të Tiranë, por se bashkia Tiranë ishte vetëm një kliente e qeverisë.
Lidhur me këtë fakt, kanë reaguar nga PD, të cilët përmes fakteve nxorën deklaratën e Veliaj të vitit 2017.
Kryetari i Këshillit Bashkiak të PD, Ilir Alimehmeti, në një deklaratë për media tha se Veliaj po përgënjeshtron veten për inceneratorët inekzistentë të Tiranës dhe Elbasanit, pasi ishte vetë ai që kishte kërkuar ta qeverisë inceneratorin që në vitin 2017.
DEKLARATË PËR MEDIA E KRYETARIT PËR KËSHILLIN BASHKIAK TË PD, ILIR ALIMEHMETI
Dy ditë më parë, Erion Veliaj deklaroi në një emision se nuk ishte ai që kishte kërkuar ndërtimin e inceneratorit të Tiranë, por se bashkia Tiranë ishte vetëm një klientë e qeverisë. Le ta dëgjojmë se çfarë thotë zoti Veliaj i vitit 2023.
Tani, le të dëgjojmë se si e përgënjeshtron veten Veliaj, pikërisht gjatë mbledhjes së Këshillit Bashkiak të muajit shtator 2017.
Pra në mbledhjen e Këshillit Bashkiak në shtator të 2017 Veliaj e thotë me krenari se është Ai që i ka kërkuar qeverisë inceneratorin e Tiranës, frymëzuar nga suksesi i inceneratorit të Elbasanit, madje e ka kërkuar për të gjithë Qarkun.
Po kështu, vetë Veliaj thotë se nuk do të ketë kosto shtesë për bashkinë e Tiranës, se ai tashmë ka shprehur angazhimin për Bashkinë e Tiranës, dhe se angazhimi konkret i kostove do t’i paraqitet Këshillit Bashkiak sapo të jetë gati.
Tani le ta vendosë vetë Veliaj se cilit Erion duhet tí besojmë, atij të 2017 apo 2023?
Për këtë dhe për kërkesat me shkrim që i kemi përcjellë, të cilave z.Veliaj refuzon t’u përgjigjet që nga shtatori, e ftojmë të na përgjigjet në mbledhjen e datës 21, të thirrur me urgjencë nga 22 këshilltarët bashkiakë për inceneratorin e Tiranës.
E sigurojmë gjithashtu zotin Veliaj, se grupi ynë i këshilltarëve është i gatshëm që të shkojmë bashkë me të, për të parë qoftë inceneratorin jashtë funksioni të Elbasanit, qoftë atë inekzistent të Tiranës.
Le ta zgjedhë Erion Veliaj nëse këto vizita do t’i bëjmë përpara apo pas mbledhjes së posaçme të Këshillit Bashkiak që do të zhvillohet të enjten, më 21 dhjetor, në orën 4.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
