Vrasja e ish-Kryeministrit japonez/ Rama: Themelet e demokracisë tronditen kur politikanët shihen si armiq. Meta: Akt i rëndë kriminal

Kryeministri Edi Rama dhe Presidenti Ilir Meta kanë reaguar pas vrasjes së ish-Kryeministrit japonez Shinzo Abe.

Rama thotë se themelet e demokracisë tronditen, kur politikanët shihen si armiq.

I tronditur dhe i pikëlluar nga vdekja e ish-kryeministrit Shinzo Abe. Ngushëllimet tona më të thella familjes së tij dhe popullit të Japonisë.

Vrasja e tij nxjerr në pah se sa shumë tronditen themelet e demokracisë kur politikanët shihen si armiq për t'u shkatërruar dhe jo si kundërshtarë për tu angazhuar!

Nga ana e tij Presidenti shprehet thellësisht i tronditur nga lajmi për ndarjen nga jeta në mënyrë tragjike të ish-Kryeministrit të Japonisë, Shinzo Abe.

Dënoj me forcë aktin e rëndë kriminal dhe jam i bindur se autori do të marrë dënimin e merituar! Duke ruajtur kujtimet e një takimi mbresëlënës gjatë vizitës në Japoni dhe vlerësuar përkushtimin e pandërprerë për forcimin e marrëdhënieve dypalëshe, ish-Kryeministri Abe do të mbahet mend si një mik i çmuar i Shqipërisë dhe popullit shqiptar.

Ngushëllimet më të ndjera për familjen dhe popullin mik japonez, të cilëve u gjendemi pranë në këto momente të vështira!