Deputeti i Partisë Demokratike, Besard Xhaferri, ka ngritur akuza të forta në “MCN Live”, ku ka komentuar zhvillimet dhe debatet publike rreth dosjes së AKSHI-t, si dhe menaxhimin e fondeve publike në projektet e digjitalizimit në vend.
Xhaferri u shpreh se, sipas tij, ekzistojnë prova dhe indicie që tregojnë për një sistem të deformuar në administrimin e fondeve publike dhe të dhënave shtetërore. Ai theksoi se, ndonëse respekton parimin e prezumimit të pafajësisë, debati publik mbi këto çështje është tashmë i pashmangshëm për shkak të ekspozimit mediatik.
Provat dhe përgjimet dhe gjithë faktet që kanë dalë e tregojnë që Karçanaj është një zonjë e implikuar në aferat më korruptive të historisë së Shqipërisë.
Patjetër që në sistemin e drejtësisë evropiane, çdo njeri prezumohet i pafajshëm derisa dënohet në shkallën e dytë, pra në apel. Por në këtë gjë, duke i parë edhe provat, pak a shumë edhe një gjyq publik në Shqipëri fillon dhe bëhet.
Ai shtoi se, sipas tij, mënyra se si zhvillohet debati publik shpesh shndërrohet në “luftë PR-i”, ku palët, sipas tij, tentojnë të kontrollojnë narrativën përballë akuzave.
Në vijim të deklaratës së tij, Xhaferri kritikoi edhe mënyrën e menaxhimit të projekteve të digjitalizimit, duke pretenduar se fondet e mëdha të investuara nuk janë reflektuar në përmirësimin e shërbimeve publike.
Nëse aty janë bërë, ku di unë, një miliard euro tendera në këto dymbëdhjetë-trembëdhjetë vjet, dhe ne kemi një mbrojtje kibernetike mizerabël, një “e-albania” që s’punon, një digjitalizim të lënë përgjysmë, tregon që aty ka qenë një çerdhe dhe një fabrikë korrupsioni, ku shumë njerëz janë pasuruar pa u lodhur fare.
Dhe prandaj sot kemi edhe tentakulat e krimit aty, sepse krimi lodhet të pasurohet, riskon duke blerë drogën, duke u munduar ta transportojë, duke e shpërndarë, duke u mbrojtur nga policia. Ka halle edhe krimi, kurse këtu është pa halle, te AKSHI pasurohesh pa halle. Si thoshte ai, nga dy e bëjmë katër.
Ai përmendi si shembuj probleme në funksionimin e platformave shtetërore dhe, sipas tij, mungesë eficience në përdorimin e fondeve.
Të dhënat futen në një nivel tjetër që normalisht edhe teleshikuesit nuk e kuptojnë. Të dhënat janë pasuri. Po nuk e kuptojmë këtë, sepse ne i japim të dhënat, prandaj këto kompani janë më të vlefshmet në botë, sepse kanë të dhëna.
Dhe AKSHI i posedonte këto të dhëna dhe i përdorte në mënyrë private. Pra një shtet që i mbledh të dhënat dhe pastaj i përdorin privatisht njerëz si Ermal Beqiri apo Gys Agasi, pra kemi një gërshetim shtet–teknologji–krim”, deklaroi Xhaferri, duke kërkuar hetim të thelluar mbi çështjen.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
