LSI udhëzon ngritjen e shtabit elektoral për zgjedhjet e 6 marsit

Lëvizja Socialiste për Integrim udhëzoi ngritjen e shtabit elektoral në 6 bashkitë për zgjedhjet e pjesshme vendore.

Udhëzimi i Sekretarit të Përgjithshëm të LSI-së, Endrit Braimllari, i është drejtuar strukturave të partisë në bashkitë Durrës, Shkodër, Dibër, Lushnjë, Vorë, Rrogozhinë.

Në udhëzimin e LSI-së thuhet se, në momentin kur nuk është zyrtarizuar ende asnjë kandidaturë nga forcat e tjera politike, LSI ka nisur punën përsa i përket rolit të saj në to.

Sipas ligjit, LSI ka një rol të rëndësishëm në administrimin zgjedhor, përmes përfaqësuesve të saj në KZAZ, në qendrat e votimit, si dhe në tavolinat e numërimit të votave.

“Për rritjen e efikasitetit elektoral të Lëvizjes Socialiste për Integrim, udhëzoj ngritjen e shtabit elektoral në këto 6 bashki”, parashikon udhëzimi i shpërndarë në struktura.

1. Ngritjen e shtabit elektoral në bashkitë Durrës, Shkodër, Lushnjë, Dibër, Vorë, Rrogozhinë, për organizimin, koordinimin dhe drejtimin e fushatës elektorale në zgjedhjet e pjesshme vendore për kryetar bashkie, që do të mbahen në datën 6 mars 2022.
2. Shtabi elektoral do jetë më këtë përbërje:
3. Koordinatori Politik i Qarkut;
4. Kryesia e LSI-së në bashki, kryesia e forumit të gruas dhe kryesia e forumit rinor; (bashkia Durrës, Shkodër, Lushnjë, Dibër, Vorë, Rrogozhinë)
5. Delegatët e Konventës Kombëtare; (delegatët e bashkisë Durrës, Shkodër, Lushnjë, Dibër, Vorë, Rrogozhinë)
6. Ngarkohet Koordinatori Politik i Qarkut për ndjekjen dhe zbatimin e këtij udhëzimi.”

Shtabi Elektoral i LSI do të drejtohet nga Koordinatori Politik i Qarkut dhe do të përbehet nga: Koordinatori Politik i Qarkut, Kryesia e LSI-së në bashki, kryesia e forumit të gruas dhe kryesia e forumit rinor, Delegatës e Konventës Kombëtare, sipas bashkive respektive.