Kryemadhi: Rama ka vendosur partinë e tij për të kërcënuar drejtësinë

Fill pas konferencës për media të kryeministrit Edi Rama dhe ministrit të Drejtësisë Ulsi Manja, që kërkuan që SPAK të hetojë prokurorët dhe gjyqtarë e larguar nga vetingu, ka reaguar kryetarja e LSI-së, Monika Kryemadhi.

Në reagimin e saj, Kryemadhi akuzon kryeministrin se ka vendosur partinë e tij në pushtet për të kërcënuar drejtësinë.

Në vitin 2016 miratuam me 140 vota dhe ndihmën e SHBA-BE një reformë në drejtësi që të hiqnim përfundimisht duart e politikës nga drejtësia.

 Sot, kryeministri i vendit e ka vendosur partinë e tij në pushtet, në funksion të kërcënimit të prokurorëve dhe gjyqtarëve, që të mos dënojnë korrupsionin e grupit të tij. Gjithçka e thënë me logon e partisë socialiste në sfond. Moralisht e turpshme, ligjërisht e dënueshme.

Kryemadhi shprehet se “Rama deklaron se ka udhëhequr Reformën në Drejtësi, por ajo nuk është si reforma në ujin e pijshëm që ai me Alqin e inceneratorëve e përdorën për të zhytur drejt falimentit bashkitë dhe duke rënduar familjet shqiptare përmes taksave të larta. Reformën në Drejtësi e konceptuam dhe miratuam me 140 vota që të mos ishte Ramaforma e radhës. Sot shohim si Rama i ngërdheshet prokurorëve dhe gjyqtarëve, duke i thënë se i ka ndihmuar të kalojnë vetingun, ndaj është herezi që sistemi i drejtësisë të hetojë kryekorruptuesin e sistemit dhe bandën e tij”.

Një sistem i pavarur i drejtësisë është jetik për të frenuar shpopullimin dhe nxitur integrimin evropian të Shqipërisë, ndërsa synimet e kryeministrit janë krejt të ndryshme. Tik Tak ora jote po afron.