Projekti i Unazës së Madhe nuk do të anulohet, por mund të korrigjohet. Ministrja e Energjetikës, Belinda Balluku, tha sot se ky projekt është i korrigjueshëm dhe një tryezë me Bashkinë e Tiranës dhe specialistë të fushës do të vlerësojë çdo aspekt të projektit të lotit të tretë.
"Projekti i Unazës së Madhe nuk është i anulueshëm por i korrigjueshëm. Kam kërkuar zhvillimin e një tyreze me Bashkinë e Tiranës dhe specialistë që do vlerësojnë në çdo aspekt projektin e lotit të 3, duke mos përjashtuar një përmirësim të projektit nëse ka vend", tha Balluku në një dalje për mediat.
Ministrja tha se prishjet e ndërtesave për t’i hapur rrugë zbatimit të projektit do të vijojnë. “Familje në mes të katër rrugëve qoftë dhe kur nuk kanë titull pronësie, nuk lëmë. Prishjet e godinave që pengojnë projektin do vazhdojnë pa asnjë diferencim", tha ajo.
Dy ditë më parë, presidenti Meta i kërkoi qeverisë anulimin e menjëhershëm të Projektit për “Rehabilitimin e segmentit rrugor mbikalimi i Pallatit me Shigjeta – Rrethrrotullimi i sheshit “Shqiponja” dhe nisjen e procedurave me garë të hapur për të realizuar një Projekt të Ri. Sipas Metës, projekti paraqet shkelje të shumta ligjore dhe në vend të tij duhet të hartohet një i ri, për të cilin duhen bërë detyriminsht konsultime publike me banorët e zonës dhe me ekspertë të pavarur.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
