Këshilli i Sigurimit i Organizatës së Kombeve të Bashkuara do të mblidhet sot pasdite në Nju Jork, për të shqyrtuar raportin e radhës të Sekretarit të Përgjithshëm të OKB-së, Antonio Guterres rreth punës së UNMIK-ut.
Kosova në këtë takim do të përfaqësohet nga zëvendëskryeministrja dhe ministrja e Punëve të Jashtme dhe Diasporës, Donika Gërvalla.
Në raportin ku janë përmbledhur zhvillimet e fundit, ndër të tjera përmenden moslejimi i mbajtjes së referendumit dhe zgjedhjeve serbe në Kosovë, dialogu Kosovë-Serbi si dhe lufta në Ukrainë.
Në një deklaratë të përbashkët të lëshuar më 23 mars, Franca, Gjermania, Italia, Britania e Madhe dhe SHBA-të njohura kolektivisht si Quint-shprehën “zhgënjim të madh” në Prishtinë për dështimin për të “demonstruar përkushtimin e saj ndaj parimit të mbrojtjes civile dhe të drejtat politike të të gjithë qytetarëve të saj, përfshirë anëtarët e grupeve minoritare”.
Edhe çështja e suspendimit të kryetares së Gjykatës në Mitrovicë, Liljana Stevanoviç si dhe protestat që pasuan këtë vendim janë përmbledhur në raport.
Poashtu theksohet se dialogu i ndërmjetësuar nga BE-ja në mes të Kosovës dhe Serbisë ka qenë i bllokuar që nga mesi i vitit 2021.
Pas një ndërprerjeje prej nëntë muajsh në bisedimet e nivelit të lartë, Vuçiç dhe Kurti u takuan më 15 qershor dhe 19 korrik 2021 nën kujdesin e Përfaqësuesit të Lartë të BE-së për Punë të Jashtme dhe Politikë të Sigurisë, Josep Borrell dhe Përfaqësuesit Special të BE-së për Dialogun Beograd-Prishtinë, Miroslav Lajçak. Pas takimit, të dy liderët treguan se qëndrimet e tyre mbeten shumë të ndryshme”.
Më tej potencohet se marrëdhëniet midis Beogradit dhe Prishtinës kanë mbetur përgjithësisht të qëndrueshme që nga informimi i fundit i Këshillit më 15 tetor 2021, por se lufta në Ukrainë ka ngritur shqetësime rreth tensioneve gjeopolitike në Ballkanin Perëndimor.
Takimi i fundit i KS është mbajtur në tetor 2021, gjashtë muaj më parë dhe që nga ai takim nuk ka pasur ndryshime të mëdha në raportet midis Kosovës dhe Serbisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
