Ambasada ruse në Tiranë ka reaguar pas vendimit të Ministrisë së Jashtme të Shqipërisë për të dëbuar diplomatin Alexey Krivosheev, me argumentin se kishte shkelur rregullat anti-Covid.
Në një postim në profilin e saj në “Facebook”, Ambasada Ruse në Tiranë thotë se pala shqiptare nuk i ka përcjellë asnjëherë shqetësime për sjelljen e diplomatit Alexei Krivoshev, por për një tjetër diplomat.
“Jemi të befasuar nga përmbajtja e deklaratës përkatëse të Ministrisë së Jashtme të Shqipërisë për shtypin. Përkundër deklaratave të Ministrisë, emri i Aleksei Krivoshev nuk është përmendur kurrë gjatë kontakteve midis Ambasadës Ruse dhe Ministrisë së Jashtme të Shqipërisë. Për herë të parë dhe të fundit, ajo u shfaq në verbalin e Ministrisë së Jashtme të Shqipërisë të datës 20.01.2021, sipas të cilit z. Krivosheev u shpall një person “non-grata”. Në të njëjtën kohë, nuk ka prova se janë shkelur masat anti-Covid të marra në Shqipëri”, thuhet në reagim.
Sipas Ambasadës Ruse, një pretendim i tillë është ngritur në një takim të ambasadorit në korrik të 2020, por bëhej fjalë për një diplomat tjetër.
“Sa i përket z. Krivoshev, pas fillimit të nëntorit 2020 ai u diagnostikua me COVID-19, ai ishte nën protokoll mjekësor për dy javë në vetë-izolim me familjen e tij, duke respektuar rreptësisht karantinën e përcaktuar, dhe shkoi në punë vetëm pasi kaloi dy teste negative. Ai nuk kishte kontakte të jashtme, përveç vizitës në institucionet mjekësore për testin”, thuhet më tej.
Ambasada i cilëson të pabaza dhe të trilluara pretendimet e ngritura dje nga MPJ dhe vë në diskutim dëshirën e palës shqiptare për marrëdhënie miqësore.
“Ne besojmë se akuzat e ngritura ndaj tij janë të pabaza dhe janë të trilluara. Në sfondin e kësaj sigurie të palës shqiptare, dëshira për zhvillimin e marrëdhënieve miqësore është e dyshimtë”, thuhet në reagim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
