Droga në shkolla, Xhixho kërkon tërheqjen e ligjit për kanabisin

Nënkryetarja e Partisë së Lirisë, Erisa Xhixho, tha në një deklaratë për mediat se droga u serviret të rinjve shqiptarë prej vitesh në mjediset e shkollës. Xhixho tha se arrestimi i shpërndarësve të drogës nëpër shkolla është në fakt tregues i dështimit të policimit në komunitet dhe mekanizmave të tjerë parandalues.

Ka disa ditë që në media raportohet arrestimi i dhjetëra shpërndarësve të drogës në afërsi të shkollave të vendit.
Por pyetja qe shtrohet sot nga te gjithe eshte: Kush e shkaktoi kete situate alarmante ne mjediset arsimore shqiptare?

Operacioni që po propagandohet me bujë si sukses nuk është gjë tjetër veçse tregues i dështimit spektakolar të mekanizmave parandalues që duhej të garantonin sigurinë dhe shëndetin e fëmijëve tanë në institucionet arsimore të gjithë vendit.
Tregu i drogës në shkolla nuk u krijua brenda natës ,por është mbi të gjitha pasojë e kësaj qeverie që jo vetëm nuk e dekurajoi, por frymëzoi bandat e drogës në vend.
Policimi në komunitet ka dështuar ! Kjo qeveri ka përgjegjësinë kryesore për këtë situatë ulëritëse për të rinjtë tanë.
Rezultatet e aksionit që Policia e Shtetit na tregon çdo ditë janë thjesht numra provizorë.

Deputetja e Partisë së Lirisë bëri thirrje për tërheqjen e ligjit që legalizoi kanabisin dhe atë të lojërave të fatit, në mënyrë që të parandalohet plaga sociale që krijojnë droga dhe kumari.

Kjo qeveri që e ka kthyer vendin në Kolumbinë e Europës i ka dhënë provat se aleancën me bandat e drogës nuk e ka shkëputur asnjëherë. Droga ka pushtuar qeverisjen e vendit dhe fondet publike prej vitesh.
Jeta dhe shëndeti i fëmijëve dhe të rinjve shqiptarë është sot në rrezik!

Në këto kushte, nëse vërtet kjo maxhorancë do e kishte të vërtetë luften me drogen te marri nje vendim sot , te tërheqi urgjentisht ligjin për kanabisin, si një kërcënim madhor për mijëra fëmijë e të rinj në mbarë vendin.
Kjo plagë e madhe që është hapur te brezi i ri nuk mund të mbyllet, ndërsa forma të reja të lëndës narkotike u ofrohen fëmijëve e të rinjve, tashmë edhe me bekimin e ligjit. Me një dorë ua heqin sot e me tjetrën do t’ua servirin nesër.
Siç ndodhi me lojërat e fatit, të cilat kjo qeveri po i rikthen sërish bashkë me plagët sociale që ato hapin.
Ata pak të rinj që kanë mbetur në vend janë sot të sfiduar nga qeveria e vet.
Pasojat sociale të drogës dhe lojërave të fatit do të jenë katastrofike. Dëmet e që ato shkaktojnë te të rinjtë janë në pjesën më të madhe të parikuperueshme.
Ndaj duhet te veprohet sot, dhe pse shume vone, duke i anuluar këto dy ligje!

Është urgjente që e ardhmja e brezit të ri dhe siguria e tyre të jete prioriteti yne numër 1.