Kryetarja e Autoritetit për Informimin mbi Dokumentet e Ish-Sigurimit të Shtetit (AIDSSH), Gentiana Sula, raportoi sot në Kuvend për veprimtarinë e institucionit gjatë vitit 2020.
Në fjalën e saj në Kuvend, Sula tha se raportimi i sotëm përmbledh punën e bërë nga Autoriteti për Informimin mbi Dokumentet e ish-Sigurimit të Shtetit gjatë vitit 2020 dhe synimet për më tej.
“Sot, në vitin e pestë të funksionimit të Autoritetit, vlen të theksohet roli dhe kontributi konkret i institucionit në përballjen e shoqërisë shqiptare me të shkuarën komuniste; po ashtu, në reformën në drejtësi, Vetingun në trupin diplomatik dhe Policinë e Shtetit; në deklasifikimin e dosjeve sekrete dhe zbardhjen e ngjarjeve të shumëdiskutuara të regjimit komunist; në publikimin e studimeve mbi dokumente, ngjarje dhe personalitete të historisë sonë kombëtare, brenda dhe jashtë vendit, në shqip e anglisht; për praninë online, transparencën dhe komunikimin aktiv me publikun e të gjitha moshave e përkatësive, si dhe mediat kombëtare e ndërkombëtare; për nderimin e figurave historike dhe shembujve frymëzues mes njerëzve të thjeshtë; për pastrimin e baltës e rikthimin e dinjitetit emrave të anatemuar e stigmatizuar nga sistemi komunist; për kontributin për kthimin në vendkujtese të vendeve të vuajtjes së dënimit dhe të ndëshkimit dhe së fundi, për kontributin në çështjen e të pagjeturve të regjimit komunist, plagë ende e hapur e shoqërisë shqiptare dhe një ndër pikat me rëndësi të drejtësisë tranzitore, e mbështetur fuqishëm nga Bashkimi Europian dhe Kombet e Bashkuara”, tha ajo.
Ajo shtoi se “Autoriteti mund të bëjë një bilanc të veprimtarisë, mes: sfidave dhe arritjeve në përballjen me të shkuarën e afërt, shërbimin e dokumentacionit subjekteve të përcaktuara në ligjin organik 45/2015, i ndryshuar, si të prekurve, familjarëve, institucioneve të drejtësisë, atyre publike dhe të pavarura, studiuesve dhe mediave,hulumtimin shkencor dhe edukimin qytetar,shkëmbimet me partnerët në vend dhe ata ndërkombëtarë, përvojën e mbledhur dhe synimet për të ardhmen.
Përsa i përket rekomandimeve të Bashkimi Europian, Sula tha se “në raportin e progresit 2020 të Komisionit Europian për Shqipërinë, ka pasur progres, në veçanti në zbatimin e reformës në drejtësi ku theksohet rëndësia e proceseve të zbatimit të reformës, në veçanti vlerësimi i figurës së gjyqtarëve dhe prokurorëve (vettingu).
Po ashtu, Sula u shpreh se “2020 është viti i ndryshimeve ligjore të miratuara në Kuvend, që garantojnë me saktësi vijimësinë e verifikimit të kandidatëve dhe figurave në institucionet e larta shtetërore, në organet e vettingut në drejtësi dhe të policisë, si një ndër hallkat e sistemit të drejtësisë”.
Sula shtoi se “shërbimi ndaj publikut gjatë vitit 2020, në shifra: 214 kandidatë apo zyrtarë janë verifikuar, kanë përfunduar procedurat për 509 kërkesa individuale, për 99 kërkesa janë mbyllur procedurat lidhur me faktin e qenies në internim për motive politike të kërkuesve për efekte pensioni, 120 kërkesa studimore e mediatike të përfunduara me 451 dosje të trajtuara e të zbardhura. 52.867 dokumente të deklasifikuara, 12.0478 fletë dokumente arkivore të digjitalizuara, 6 marrëveshje bashkëpunimi të nënshkruara”.
“Dy tregues të performancës së organit kolegjial:76 mbledhje të organit kolegjial, 726 vendime nga të cilët 716=98% vendime unanime 9 procese gjyqësore në ankimim të vendimeve të organit kolegjial, nga të cilat 8 procese gjyqësore janë fituar në vitin 2020-fillim viti 2021, një është në proces”, tha Sula.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
