Kryetarja e Kuvendit të Shqipërisë, Lindita Nikolla, i ka dërguar sot një letër urimi Presidentes së re të zgjedhur të Parlamentit Evropian, Roberta Metsola.
“Me rastin e zgjedhjes në detyrën e lartë e të nderuar të Presidentes së Parlamentit Evropian, ju dërgoj urimet më të përzemërta të Kuvendit të Shqipërisë dhe të miat personalisht”, ka shkruar ajo.
Kryeparlamentarja është shprehur e bindur së prania e Metsolës në PE do të jetë “mbështetje e madhe për Shqipërinë në rrugëtimin evropian”.
Ajo ka shtuar se, me zgjedhjen e Metsolës do të zgjerohet bashkëpunimi me Kuvendin e Shqipërisë dhe institucioneve evropiane.
Roberta Metsola mori detyrën e re në krye të PE-së të martën e 18 janarit, në vend të David Sassoli-t , i cili ndërroi jetë javën e kaluar.
Metsola, 43 vjeçe, vjen nga Malta dhe i përket fraksionit të qendrës së djathtë të Partisë Popullore Evropiane. Ajo është bërë gruaja e parë në 20 vjet që mban këtë post.
Presidentja e re e PE-së u zgjodh me një shumicë të qartë prej 458 vota pro nga 616 gjithsej.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
