Deputetët e Kuvendit të Shqipërisë sot në nisje të seancës plenare mbajtën një minutë heshtje në nderim të ish-deputetit të Partisë Demokratike, Gerti Bogdani, i cili u nda nga jeta një ditë më parë në moshën 44-vjeçare.
Kryetarja e kuvendit, Elisa Spiropali teksa ftoi deputetët të mbajnë një minutë heshtje në nderim të Bogdanit, tha se janë këtu për të shprehur dhimbjen për ndarjen e papritur nga jeta të ish-deputetit.
Pas nderimit të kolegut të tyre, deputetët demokratë janë larguar nga salla në respekt të vendimit të bërë publik që një ditë më parë, pasi ditën e sotme e shpallën ditë zie, në nder të tij.
Ata kishin njoftuar se të gjitha aktivitetet e Partisë Demokratike në datat 18 dhe 19 shtator në të gjithë vendin do të anulohen, po ashtu në të gjitha selitë e PD-së, flamujt do të ulen në gjysmështizë.
Ish-deputeti Bogdani ndërroi jetë dje si pasojë e një arresti kardiak. Homazhet në nderim të tij u mbajtën paraditen e sotme në hollin e Kuvendit.
Seanca e kuvendit ndërkaq ka vijuar me rendin e ditës, kur një ndër pikat më të rëndësishme është ajo që ka të bëjë me studentët e Universitetit të Mjekësisë, konkretisht, projektligji “Për një shtesë dhe disa ndryshime në ligjin nr. 60/2023 “Për trajtimin e veçantë të studentëve që ndjekin programin e integruar të studimit të ciklit të dytë “Mjekësi e Përgjithshme” në institucione publike të arsimit të lartë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
