Në media po qarkullon një fotografi e cila sugjeron se bën fjalë për anëtarët e grupit të punës që kanë marrë pjesë në hartimin e draftit të Kodit të ri Penal, i cili ka ngjallur diskutime ditëve të fundit, për shkak të dënimeve të reja që përfshin, por edhe sepse konsiderohet si i pakonsultuar me grupet e interesit.
Ajo që bie në sy është se në takimin e grupit të punës, shihet edhe ministri i Drejtësisë Ulsi Manja, gjë që bie ndesh me deklaratën e Kryeministrit Edi Rama i cili tha ditën e sotme se qeveria nuk ka qenë pjesë e diskutimeve.
Sugjerohet se fotografia daton dy vite më parë në një takim të mbajtur në zonën e Drilonit në Pogradec, ku grupi i punës ka qenë duke drekuar larg vëmendjes mediatike dhe të Tiranës, ku privatësia është më e kufizuar.
Në takimin në fjalë shihet edhe kreu i Shkollës së Magjistraturës, Arben Rakipi, si dhe njëri nga ekspertët si hartues i draftit, gjyqtari dhe kreu i Unionit të Gjyqtarëve Gerd Hoxha.
Rama deklaroi sot se “Ministria e Drejtësisë dhe Këshilli i Ministrave, nuk kanë marrë pjesë në hartimin e draftit po ia kanë besuar një grupi ekspertësh të nderuar, nën udhëheqjen e drejtorit të Shkollës së Magjistraturës, Profesor Arben Rakipit.”
E me sa duket fotografia e fundit e hedh poshtë këtë deklaratë të kreut të qeverisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
