Inspektori i Lartë i Drejtësisë, Artur Metani, ka zhvilluar një vizitë zyrtare në Shtetet e Bashkuara të Amerikës, ku ka zhvilluar takime në Departamentin e Drejtësisë dhe me përfaqësues të institucioneve të rëndësishme të sistemit të drejtësisë amerikane.
Gjatë këtyre takimeve, Metani ka diskutuar mbi rolin e Inspektorit të Lartë të Drejtësisë në Shqipëri dhe rëndësinë e garantimit të një gjyqësori të pavarur, të paanshëm dhe njëkohësisht të përgjegjshëm, si një shtyllë thelbësore për funksionimin e shtetit demokratik.
Në zyrën e OPDAT, ai u takua me Zëvendësdrejtorin George Huber dhe Drejtoren Rajonale për Evropën, Pragna Soni. Në këto takime, Metani u shoqërua nga Këshilltari Ligjor Rezident i OPDAT në Shqipëri, Dave Backman, si dhe nga inspektori Periand Teta.
Diskutimet u përqendruan në rritjen e standardeve të integritetit dhe profesionalizmit në sistemin gjyqësor shqiptar, si elemente kyçe në luftën kundër krimit të organizuar dhe korrupsionit. Në këtë kuadër, Metani theksoi rëndësinë e forcimit të mekanizmave të inspektimit dhe llogaridhënies për gjyqtarët dhe prokurorët, si dhe domosdoshmërinë e respektimit të standardeve të larta etike dhe profesionale.
Ai nënvizoi gjithashtu se një sistem gjyqësor i pavarur dhe i përgjegjshëm është thelbësor për forcimin e shtetit të së drejtës dhe konsolidimin e demokracisë në Shqipëri.
Palët vlerësuan progresin e deritanishëm dhe shprehën gatishmërinë për të vijuar bashkëpunimin dhe mbështetjen ndërinstitucionale, veçanërisht në fushën e asistencës teknike dhe shkëmbimit të praktikave më të mira.
Vizita u vlerësua si një hap i rëndësishëm në thellimin e bashkëpunimit ndërkombëtar dhe avancimin e reformave në drejtësi, me synim rritjen e besimit të publikut dhe forcimin e institucioneve të drejtësisë në Shqipëri.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
