Gjatë vizitës së saj në Francë, ku mori pjesë në punimet e konferencës “No money for terror”, që u mbajt në Paris, ministrja e Drejtësisë, Etilda Gjonaj ka folur për takimin që ka pasur me presidentin francez Emmanuel Macron dhe ministren e Drejtësisë së këtij vendi, Nicole Belloubet.
Gjonaj thotë se forcimi i bashkëpunimit dypalësh është garanci për suksesin e luftës kundër terrorizmit.
“Kënaqësi e veçantë, të shkëmbenim mendime të rëndësishme me Presidentin Macron dhe homologen franceze Nicole Belloubet. Forcimi i bashkëpunimit institucional dypalësh dhe më gjerë me vendet e Aleancës, garanci për suksesin e luftës kundër terrorizmit”, ka shkruar ministrja Gjonaj në profilin e saj në "Twitter".
Ministrja e Drejtësisë i ka vlerësuar të frytshme diskutimet e zhvilluara gjatë konferencës kundër financimit të terrorizmit.
Në të njëjtën kohë Gjonaj shprehet se janë marrë angazhime konkrete për bashkëpunime të mëtejshme në çështjet e marrëdhënieve juridiksionale me jashtë për luftën kundër terrorizmit, si pjesë e një axhende të përbashkët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
