“Shkelje dhe manipulime më 11 maj”, Gjunkshi tregon tri rastet kur janë blerë vota dhe janë përdorur asetet publike

Deputeti i PD Xhemal Gjunkshi tha në edicionin e lajmeve në MCN TV se në zgjedhjet e 11 majit ka pasur shkelje dhe manipulime flagrante. 

Gjunkshi risolli në vëmendje tri raste nga qarku i Dibrës, ku tregohet se përdoren asete publike, blihen direkt vota me para e tollona, dhe një rast kur prindi i një kandidati me pozicion polic, përfshihet për blerjen e votave. 

"Sapo përfundoi një proces, farsë elektorale, aspak në përputhje me parimet, rregullat e lojës. Atë që kanë parë qytetarët shqiptarë dhe po e sheh gjithë komuniteti europian është që gjatë zgjedhjeve ka pasur shkelje dhe manipulime flagrante. Unë kam qenë një nga kandidatët në qarkun e Dibrës, vetëm në Dibër unë vet si kandidat kam konstatuar: E para përdorimin e aseteve publike të Bashkisë Dibër, në interes të përfitimit të votave ndaj qytetarëve. 

Rasti konkret është bërë publik, është rasti në fshatin Luzni, ku Bashkia Dibër, kryetari i bashkisë, drejtori i burimeve të mbështetjes në kundërshtim me ligjin iu futën një procesi në mënyrë të paligjshme.  Këtë fakt e kam denoncuar e kam çuar në SPAK. Kam rezervat e mia, sepse SPAK-u duhet të kishte vepruar në kohë, dy javë para zgjedhjeve. Kemi rastin e parë të përdorimit të aseteve publike, që është bërë prezente edhe përmes një rezolute të jashtëzakonshme të Partive Popullore. 

Është rasti i blerjes së votave. Kemi rastin e Maqellarës ku biznesmeni Fiqiri Pali që ka marrë fonde publike për të ndërtuar bulevardin e qytetit të Peshkopisë, ka marrë fonde publike për të ndërtuar sheshin e Burrelit, ky biznesmen gjendet me makinën e tij përballë zyrës elektorale Maqellarë. Gjatë kontrollit nga prokurori u gjetën materiale zgjedhore, dollarë, tollona nafte, dhe i doli për zot jo vetëm pronari i mjetit qëndroi 7 orë në lokal, dhe policia s’guxoi që ta merrte këtë zotëri dhe të kontrollonte mjetin. 

Rasti i tretë është rasti kur në një fshat, prindi i kandidatit ishte polic i shtetit, i angazhuar për të blerë vota në interes të kandidatit. Kur drejtori i policisë nuk guxonte të merrte në telefon vartësin. Ndërkohë nga drejtuesi vendor i Policisë Dibër kallëzohem unë! I garantoj qytetarët e Dibrës që ky drejtues i Policisë së Shtetit shumë shpjet do përballet vet me shkeljen e ligjit".