Meta: Ligji për amnistinë u tërhoq se u zhbënë pazaret! Zonat e Mbrojtura ligj për llogari të oligarkëve

Partia e Lirisë nuk është e gatshme për të dhënë 3 votat e saj pro amnistinë penale, duke sinkronizuar qëndrimin e saj me pjesën tjetër të opozitës.

Duke e komentuar për herë të parë shtyrjen e votimit në parlament, për shkak se PS nuk i siguroi 84 votat e nevojshme, Meta foli për zhbërje pazaresh për amnistinë.

Tërheqja nga rendi i ditës i projektligjit për amnistinë penale ishte dëshmi sesi kuvendi është marrë peng nga Rama, ku ligjet hiqen sipas axhendave të pazareve që bëhen apo zhbëhen.

Teksa e quajti Kuvendin të zhytur në paligjshmëri, Meta tha se ligji i zonave të mbrojtura i kaluar me vetëm votat e PS, është ligj për llogari të oligarkëve.

Kuvendi kaos dhe paligjshmëri, që miraton ligje për llogari të oligarkëve. I tillë ishte miratimi i ligjit të kontestuar për masakrimin e zonave të mbrojtura që rrezikojnë të kthehen në komplekse pallatesh e biznese që kanë qëllim pastrimin e parave.

Meta ka komentuar edhe protestën e opozitës së bashkuar ku u shpreh se  “agresioni dhe dhunimi i protestuesve nga banditët e Edi Ramës është një vepër e rëndë penale”. Ai tha se drejtësia duhet të nisë hetimet për keqpërdorimin e strukturave të shtetit.

Agresioni dhe dhunimi i protestuesve nga banditët e Edi Ramës është një vepër e rëndë penale, por drejtësia në vend të ndëshkojë autorët e dhunës pritet të dënojë protestuesit e arrestuar. I bëjmë thirrje drejtësisë të nisë hetimet penale për keqpërdorimin e strukturave të shtetit. Ne kërkojmë nga Avokati i Popullit që të reagojë me forcë ndaj këtyre rasteve skandaloze. Shqipëria nuk do të shndërrohet në Bjellorusinë e rajonit ku burgjet të mbushen me kritikë të regjimit.