Olli: Pak cm borë gjunjëzuan kryeqytetin, Bashkia nuk mori asnjë masë

Kryetarit të këshilltarëve të djathtë bashkiakë të Tiranës, Leonard Olli, tha sot se bashkia e kryeqytetit nuk mori asnjë masë për të lehtësuar qarkullimin e mjeteve dhe këmbësorëve pas borës që ra mbrëmë. Olli tha se mosmarrja e masave paraprake dhe neglizhenca në pastrimin e rrugëve kanë vënë në rrezik jetën e qytetarëve dhe pronat e tyre.

“Pak minuta reshje dëbore dhe shumë pak centimetra kanë mjaftuar për të bllokuar gjithçka në kryeqytetin e Shqipërisë.

Janë këto kushte që i nxorën bojën bashkisë virtuale dhe qeverisë së fasadave. Sot shumë nga kolegët tanë kanë monitoruar që në orët e para të mëngjesit trafikun në Tiranë dhe ua them me garanci skurse e ka pasqyruar dhe media. I gjithë qyteti ishte i ngrirë.

Jo vetëm që nuk u mor asnjë masë për të hedhur pak kripë sa për të penguar ngrirjen e të gjithë akseve qendrore dhe sekondare në kryeqytet, dhe që qytetarët u përpoqën t’i zgjidhnin vetë, Veliaj, stafi i tij dhe sigurisht shefi Rama flinin gjumë dhe gëzonin ëndrrat  se gjërat shkojnë shumë mirë.

Vetëm pak centimetra borë vunë jetën dhe pronat e qytetarëve në rrezik. Me dhjetëra aksidente automobilistike. Në orët e natës, mungesa e shtetit, mungesa e bashkisë është bërë shkak për dhjetra aksidente. 

Mungesa  e shtetit, mungesa e bashkisë është bërë shkak për paralizimin e plotë të transportit publik. Mungesa e bashkisë dhe papërgjegjshmëria kriminale e kryebashkiakut Velija gjunjëzoi kryeqytetasit në kushtet e një moti aspak ekstrem.

Imagjinoni sikur Tirana të ishte në kushtet e motit të një qyteti tjetër si p.sh. Korça se çfarë do të ndodhte. Ndërkohë shumë jetë janë vënë në rrezik nga mungesat e urgjencave spitalore sepse mjetet e transportit të urgjencave nuk mundën të qarkullonin.

Dhe kur kjo situatë paralizuese ndodh në zemër të Shqipërisë imagjinoni se çfarë po kalojnë zonat e thella.

Ka vetëm një përgjegjës dhe ky është Veliaj, i cili në vend që të merret vetëm me administrimin e qytetit tenton duke vjedhur projekte duke riinaguruar punë publike të parardhësit të tij, të tentojë kreun e PS-së, por sigurisht duke braktisur tërësisht besimin e qytetarëve të Tiranës që i dhanë për menaxhimin e qytetit.

I bëjmë thirrje bashkisë për të hedhur sa më parë kripë në rrugë dhe trotuare.