Kreu i Kuvendit Gramoz Ruçi ka pritur sot në Tiranë një delegacion me deputetë nga Kosova. Vizita e parlamentarëve kosovarë vjen pas miratimit të dy rezolutave për heqjen e roaming dhe kontrollit doganor në Kuvendin e Kosovës.
Deputetët e Kosovës kanë njohur Gramoz Ruçin me këto dy rezoluta, i cili ka shprehur edhe dakordësinë.
Kryetari i Kuvendit nënvizoi se ky është një hap pozitiv i bashkëpunimit midis Shqipërisë dhe Kosoës.
“Është detyra e kuvendeve të të dy vendeve të lehtësojmë bashkëpunimin e gjithanshëm midis Shqipërisë e Kosovës, në mbështetje të interesave të qytetarëve. Për të dy palët ekziston vullneti i plotë dhe i qartë politik. Këto rezoluta janë një hap pozitiv, por duhen parë me kujdes teknikalitetet e zbatimit të tyre prej qeverive dhe institucioneve të të dy vendeve”, u shpreh Ruçi.
Gjatë bisedës u ra dakord që kuvendet e të dy vendeve duhet të nxisin bashkëpunimin edhe nëpërmjet komisioneve parlamentare.
Gjithashtu u bisedua edhe për çështje të tjera të bashkëpunimit dypalësh në fushën e energjisë, njehsimit të diplomave e plotësimit të standardeve të integrimit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
