Kuvendi i Shqipërisë ka njoftuar këtë të shtunë mbi zhvillimet që do të ketë seancën e parë Parlamentare. Një njoftimin për media, thuhet se seanca e parë plenare e sesionit të ri të Kuvendit të Shqipërisë do të zhvillohet ditën e hënë, datë 17.01.2022, ora 16:00. (Urdhër nr. 2, datë 14.01.2022, i Kryetares së Kuvendit, znj. Lindita Nikolla.)
Në orën 17:00, seancën do ta përshëndesë Presidenti i Republikës së Turqisë, Recep Tayyip Erdoğan.
Mbështetur në vendimin e Konferencës së Kryetarëve të datës 12 tetor 2021, gazetarët dhe operatorët mund të ndjekin e transmetojnë punimet e seancës plenare nga galeria e sipërme e sallës së seancave. Operatorët mund të marrin plane me kamerat e tyre në fillimin e seancës plenare, për një periudhë kohore deri në 5 minuta nga hapja e seancës.
Pas marrjes së planeve, operatorët do të shoqerohen nga punonjesit e Zyrës së Shtypit në ambjentet e jashtme, ndërsa gazetarët mund të qëndrojnë në galeri gjatë gjithë kohëzgjatjes së seancës plenare.
Ju lutem, mbani parasysh që, në respekt të akteve normative të mbrojtjes nga pandemia Covid-19, gazetarët dhe kameramanët, të cilët ndjekin seancën, duhet të paraqesin çertifikatën e vaksinimit ose testin negativ, përpara zhvillimit të seancës. Çertifikata ose testi do t’i dorëzohen punonjësit të Zyrës së Shtypit në hyrjen e sallës së seancave.
Kujtojmë që Presidenti i Turqisë do të vizitojë vendin tonë më 17 janar, ndërsa fillimisht ai do të jetë pjesë e ceremonisë në banesat e ndërtuara në Laç, të dëmtuara më herët nga tërmeti i 26 nëntorit 2019. Policia e Shtetit njoftoi pasditen e së shtunës masat e marra për mbarëvajtjen e kësaj visite, ku në disa akse është ndaluar qarkullimi i kamionëve apo dhe mjeteve të tjera. Policia bëri apel që këto mjete të përdorin rrugët dytësore për të shkuar në destinacion.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
