Nga çadra e lirisë në ditën e 83 të protestës, kreu i Partisë Demokratike Lulzim Basha ftoi masivisht qytetarët që të bashkohen në protestën e 13 majit, sipas të cilit do të kalojë autostrada referendare për zgjedhje të lira dhe të ndershme.
"Miqtë tanë anë e mban botës, duhet ta dinë fare mirë se rruga evropiane nuk mund të kalojë nga bojkoti, nuk mund të kalojë e nuk do të kalojë nga mospjesëmarrja, por kurrsesi nuk do të kalojë nga asgjësimi i garës së vërtetë, nuk do të kalojë nga kthimi i monizmit pas 27 vitesh që e shporrëm. Nuk mundet dhe nuk do të kalojë nga votime farsë të diktuara nga krimi dhe droga.
Rruga evropiane e Shqipërisë do të kalojë nga autostrada referendare e 13 majit për zgjedhje të lira dhe të ndershme. Ndaj bashkohuni me mua, familjen time, me fëmijët e mi do të jemi këtu. Ejani me zemrat e mbushura me besim tek e nesërmja që na pret. Unë e kam parë këtë të nesërme, ju po e ndërtoni ditë për ditë.
Bashkë do të shembim çdo pengesë. Bashkë do të nxjerrim në pension kupolën e korruptuar të Republikës së Vjetër do t’ia dorëzojmë Muzeut Kombëtar në pavionin e turpit. Ejani pa frikë. Ky do të jetë manifestimi gjigant. Askush të mos mungojë në këtë moment të historisë, në këtë moment të Evropës që do të vijë e shpalosur me vlerat e saj", tha Basha në fjalën e tij.
Kreu i opozitës Basha tha se protesta do të hyjë në histori si referendumi për Republikën e Re, dhe kësaj i trembet republika e vjetër, krimi dhe droga. "Nuk ka forcë kriminale, nuk ka shtet të korruptuar t’i bëjë ballë dëshirës së qytetarëve për liri", tha Basha.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
