Boiken Abazi i Lëvizjes Vetëvendosje sot në një dalje publike, ka ripërsëritur denoncimin e tij se ëhstë manipuluar vota e eklektoratit të tij, dhe se do ta çojnë deri në fund betejën ligjore të nisur për shkak të fakteve dhe vjedhjeve të konstatuara gjatë procesit të votimit.
Abazi u shpreh se modeli që ka instaluar PS te qytetarët është një model frike i cili duhet të refuzohet.
Sipas tij, në Shqipëri është instaluar autoritarizmi elektoral, dhe pjesë e problemit, sipas tij, është edhe opozita.
"Ndryshimet e mëdha në Shqipëri nuk mund të realizohen nga subjektet e vjetra politike, zgjedhjet e fundit e dëshmuan këtë. Pushteti ka mbjellë gjatë gjithë kohës frikë dhe nuk ka lënë mjet pa përdorur sepse në Shqipëri është instaluar autoritarizmi elektoral.
Ndryshimet e fundit në Kodin Zgjedhor nga ky pushtet vetëm sa e kanë përkeqësuar situatën. Ky lloj autoritarizmi ka nisur që në vitin 2008, kur në atë kohë u ndryshua Kodi Zgjedhor nga Partia Demokrate dhe Partia Socialiste bashkë për të eleminuar alternativat e reja në Shqipëri. Edhe pse nuk mban përgjegjësinë kryesore në këtë situatë, opozita është pjesë e problemit.
Kryeministri Rama tha dje se PS është një makineri, unë deri diku pajtohem me këtë konstatim. PS është thjesht dhe vetëm një makineri, ajo nuk frymëzon, anëtarëve të PS nuk i ka mbetur më asnjë vlerë përbashkuese.
Modeli i instaluar nga Edi Rama synon të shndërrojë anëtarët e PS në dado, bulona në pistona apo në sedilje. Modeli i instaluar nga Edi Rama është që qytetari nuk vepron mbi vlera dhe parime. Ne e refuzojmë këtë model. I bëjmë thirrje të gjithë qytetarëve që të veprojnë bazuar mbi ndërgjegjen e tyre.
Ne duhet të çojmë betejën ligjore deri në fund, për shkak të fakteve dhe vjedhjeve që kemi grumbulluar dhe manipulimin e votës. Një pjesë të këtyre fakteve i kemi bërë publike ditën e hënë kur sapo kishte nisur procesi i numërimit. "
Në emër të VV, avokatja Suela Hasani u shpreh se i kanë paraqitur KQZ kërkesën për marrjen e pamjeve filmike të të gjitha qendrave të votimit.
"Prej dy ditësh kemi paraqitur pranë KQZ kërkesën për marrjen e pamjeve filmike të të gjitha qendrave të votimit. Kemi bërë publike fakte dhe prova që do të jenë pjesë e kërkesës ankimore që do të dorëzojmë në KAS."
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
