Partia Demokratike i ka dërguar një letër kreut të Kuvendit Gramoz Ruçi, ku i kërkon që të shkarkohen nga detyra ministri i Brendshëm, Fatmir Xhafaj dhe drejtori i Përgjithshëm i Policisë, Ardi Veliu.
Në letrën që PD i drejton kryeparlamentarit Ruçi thuhet se Ministria e Brendshme dhe Policia e Shtetit nuk i kanë vënë në dispozicion për 5 muaj asnjë dokument Komisionit Hetimor.
“Edhe pse Komisioni Hetimor, që prej muajit prill 2018, ka kërkuar informacione nga Ministria e Brendshme dhe Policia e Shtetit, deri më sot, në kundërshtim me Kushtetutën dhe me ligjin, Komisionit nuk i është vënë në dispozicion asnjë e dhënë apo dokumentacion i kërkuar, duke pamundësuar punën e tij“, thuhet në letër.
Gjithashtu, PD akuzon Ministrin Xhafaj për asgjësim provash në mbrojtje të vëllait trafikant siç thotë ajo, si dhe Tahirit, Ballës, Çyrbjës etj.
"Mandati i Komisionit Hetimor përfundoi sot pa asnjë rezultat për shkak të pengimit të qëllimshëm të punës nga qeveria", vijon më tej letra, duke shtuar se "Pengimi i Komisionit Hetimor nga Qeveria është dhunim i Kushtetutës dhe asgjësim i Parlamentit."
"PD kërkon shtyrjen e Komisionit Hetimor "Tahiri" me 3 muaj dhe qëndrim të prerë nga Kuvendi për përgjegjësit", mbyllet letra e PD drejtuar Gramoz Ruçit.
Komisionit Hetimor u ngrit këtë vit për të kontrolluar përfshirjen e qeverisë, nëpërmjet ministrit të Brendshëm Saimir Tahiri dhe Policisë së Shtetit në kultivimin dhe trafikimin e lëndëve narkotike, por nuk ka dhënë asnjë rezultat.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
