Mediat ndërkombëtare: Grusht në fytyrë liderit të opozitës shqiptare

Mediat ndërkombëtare shkruajnë për incidentin e ndodhur gjatë protestës së opozitës, ku u godit me grusht në fytyrë, kreu i opozitës, Sali Berisha.

Reuters shkruan se udhëheqësi i opozitës shqiptare Sali Berisha u godit me grusht në fytyrë nga një kalimtar i rastësishëm mashkull, ndërsa drejtonte një turmë mbështetësish të partisë së tij në qendër të Tiranës për protestat antiqeveritare që po zhvillohen disa metra larg vendit të një samiti të BE-së.

Mijëra mbështetës të opozitës u mblodhën në kryeqytet të martën, ndërsa Shqipëria pret samitin e parë BE-Ballkan, ku marrin pjesë krerët e vendeve anëtare të Bashkimit Evropian, për të protestuar kundër qeverisë së Kryeministrit Edi Rama dhe për të kërkuar zgjedhje të parakohshme.

I njëjti lajm ndahet dhe nga US News dhe nga media të tjera.

Washington Post shkruan se lideri i Partisë Demokratike të qendrës së djathtë të opozitës shqiptare u sulmua të martën gjatë një proteste antiqeveritare të mbajtur pranë një samiti të liderëve të Bashkimit Europian dhe homologëve të tyre nga Ballkani Perëndimor në kryeqytetin shqiptar.