Analisti Baton Haxhiu, në emisionin ‘Të Paekspozuarit’ në MCN TV, komentoi debatin mbi përdorimin e paraburgimit në Shqipëri dhe nismën e kryetarit të Gjykatës së Lartë për rishikimin e kësaj praktike.
Sipas Haxhiut, në vend është krijuar një qasje shumë e ashpër dhe represive ndaj qytetarëve, e cila u theksua sidomos në periudhën kur u ndërmorën aksione ndaj personave që nuk paguanin faturat e energjisë elektrike dhe ujit. Ai theksoi se paraburgimi gradualisht është shndërruar në një praktikë të zakonshme në sistemin e drejtësisë.
Analisti u shpreh se sot paraburgimi po trajtohet si rregull dhe jo si masë e jashtëzakonshme, gjë që sipas tij tregon për një problem më të thellë shoqëror. Ai solli si shembull rastin e ish-presidentit Ilir Meta, duke thënë se mbajtja e tij për dy vite në paraburgim është e papranueshme për një shoqëri demokratike.
Haxhiu argumentoi se, pavarësisht akuzave që mund të rëndojnë mbi një person, paraburgimi për një periudhë kaq të gjatë është një praktikë e tepruar. Sipas tij, në standardet e botës moderne një situatë e tillë mund të konsiderohet edhe si formë torture.
Ai shtoi gjithashtu se fenomeni lidhet me dy probleme kryesore: nga njëra anë me pandëshkueshmërinë dhe mungesën e përgjegjësisë qytetare në të kaluarën, dhe nga ana tjetër me atë që ai e quajti “kultura e të fortit” në shoqëri. Sipas Haxhiut, kjo kulturë ka qenë për një kohë të gjatë e pranishme dhe nuk mund të ndryshohet menjëherë vetëm përmes ndëshkimeve të ashpra.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
