Ministrat Cakaj dhe Reka bisedë telefonike: Kosova e Shqipëria të ndihmojnë njëra-tjetrën në rrugën drejt BE’së

Ministri në detyrë i Integrimit Evropian në Kosovë, Blerim Reka ka zhvilluar sot një bisedë telefonike me Ministrin për Evropën dhe Punët e Jashtme të Republikës së Shqipërisë, Gent Cakaj.

Reka dhe Cakaj bëhet e ditur se kanë biseduar për nënshkrimin e “Marrëveshjes së Bashkëpunimit në mes të Ministrisë për Evropën dhe Punët e Jashtme të Republikës Së Shqipërisë dhe Ministrisë së Integrimit Evropian të Republikës së Kosovës për Mbështetjen e Ndërsjelltë në Kuadër të Përgatitjes për Hapjen dhe Zhvillimin e Negociatave të Pranimit”.

Ministrat Reka dhe Cakaj, konstatuan rëndësinë e kësaj marrëveshje për bashkëpunimin bilateral në përgatitjen ndër-institucionale për procesin integrues në Bashkimin Evropian.

Ministri Reka, i uroi homologut të tij Cakaj për rekomandimin e Komisionit Evropian, për hapjen e negociatave anëtarësuese në Bashkimin Evropian të Republikës së Shqipërisë, ndërkaq që dy së bashku ndajnë shpresën që Kosova, të gëzojë liberalizimin e vizave, dhe së shpejti, të fillojë përgatitjet për statusin e kandidatit për anëtarësim në BE.

Në bisedën telefonike, ata e vlerësuan si shumë të rëndësishme edhe anën praktike të kësaj marrëveshje, përmes së cilës zyrtarët dhe ekspertët nga të dy anët e kufirit, do të punojnë së bashku, duke këmbyer dijen dhe përvojat, brenda mekanizmave dhe strukturave insitucionale, që do të krijohen në përputhje me këtë kornizë bashkëpunimi. Në veçanti, duke u përqëndruar në krijimin e strukturave negociuese për negociatat anëtarësuese, të grupeve të ekspertëve sipas kapitujve negociues dhe për procesin e vlerësimit të screeningut. Në funksion të jetësimit të kësaj marrëveshje, do të formohet Komiteti i Përbashkët, i cili do të mblidhet dy herë në vit për të shqyrtuar planet e veprimit 6 mujore.

Në përmbledhje, ishte pajtim i përbashkët se bashkimi i kapaciteteve administrative ndër-shtetërore, përmes bashkimit të kapaciteteve profesionale, redukimit të kohës dhe kursim buxhetesh, përveç avancimit të resursve institucionale përgatitore për fazat e ardhshme integruese, do t’a shpejtojë edhe përkthimin e filluar në gjuhën shqipe të drejtës së BE (acquis) për të dyja vendet.