Mblidhet sot grupi punues i BE-së, në agjendë liberalizimi i vizave për Kosovën

Grupi punues i Këshillit të Bashkimit Evropian do të mblidhet në një takim dyditor, sot dhe nesër.

Në agjendë të këtij grupi do të jetë edhe Kosova, por për liberalizimin e vizave pritet të diskutohet gjatë së enjtes.

Ndryshe, për diskutimin e dytë të grupit punues për vizat në Këshillin e BE-së, Presidenca çeke ka dërguar një “dokument ndërinstitucional”, në të cilin tashmë është përfshirë edhe kërkesa e Francës e paraqitur në takimin e parë, më 13 tetor.

Franca kërkon që hyrja në fuqi e një vendimi eventual për liberalizimin e vizave për Kosovën, të kushtëzohet me fuqizimin e Sistemit Evropian të Informimit dhe Autorizimit të Udhëtimit (ETIAS).

Radio Evropa e Lirë ka pasur qasje në këtë dokument, i cili është bazë për diskutimet që do të zhvillohen më 9 apo 10 nëntor, në takimin e radhës të grupit punues për vizat të Këshillit të Bashkimit Evropian.

Propozimi i ndryshuar i Presidencës çeke të Këshillit të BE-së përmban kushtëzimin e hyrjes në fuqi të liberalizimit të vizave me “nisjen efektive të sistemit ETIAS”, si dhe kërkesat ndaj Kosovës që deri në hyrjen në fuqi, të përmbyllë marrëveshje për riatdhesim me ato vende të BE-së me të cilat nuk ka marrëveshje të tilla deri më tash, si dhe ta përshtatë edhe më tej politikën e saj të vizave me atë të Bashkimit Evropian.

“Heqja e vizave do të vlejë vetëm për bartësit e pasaportave biometrike të lëshuara në përputhje me standardet e Organizatës Ndërkombëtare të Aviacionit Civil (ICAO), dhe nuk do të zbatohet deri në nisjen efektive të operimit të Sistemit Evropian të informimit dhe autorizimit të udhëtimit (ETIAS)”, është formulimi i ri në draftin e fundit të tekstit të propozimit për vendimin për liberalizimin e vizave për Kosovën.

Sistemi digjital, ETIAS, synon të bëjë evidentimin e vizitorëve që hyjnë prej jashtë BE-së në zonën e lëvizjes së lirë, Schengen.

Mejithatë, disa ditë më parë, presidentja e Komisionit Evropian, Ursula von der Leyen bëri të ditur se procesi i liberalizimit të vizave për Kosovën nuk lidhet me funksionalizimin e sistemit për siguri në Evropë, ETIAS.

Von der Leyen u shpreh se teknikisht janë përmbushur kriteret për liberalizimin e vizave dhe nënvizoi se do të bëjë çmos që të bindë Këshillin Evropian për të miratuar liberalizimin e vizave për Kosovën.