Grupi i ekspertëve të Misionit Ndërkombëtar të Monitorimit ka mbajtur një konferencë shtypi në përfundim të takimeve që pati me krerët e politikës menjëherë pas mbërritjes në Tiranë.
Drejtuesja e misionit të ekipit monitorues, Genoveva Ruiz Calavera, theksoi rëndësinë që ka procesi i vetingut për hapjen e negociatave me BE-në. Ajo tha se misioni do të jetë i paanshëm dhe do të ndjekë me shumë vëmendje procesin e vetingut, i cilësuar si kyç për zbatimin e reformës në drejtësi.
Pjesë nga deklarata
ONM do t’i kryejë detyrat e saj me profesionalizëm, paanshmëri dhe në përputhje me ligjin. Dua të përgëzoj autoritetet e Shqipërisë për kornizën e gjerë për reformën e drejtësisë. Në vijim të bashkëpunimit me autoritetet shqiptare do të jemi në të gjitha fazat e procesit.
Rekomandimi kushtëzues për hapjen e negociatave ishte i qartë: Shqipëria ka bërë progres në 5 prioritetet kyçe si dhe në fusha të tjera të politikave me rëndësi. Rekomandimi theksoi nevojën për përshpejtimin e reformës dhe zbatimin e saj.
Mesazhi ynë është i qartë: ky proces vetingu është jetik për t’u hapur derën negociatave të anëtarësimit në BE.
Më lejoni të përgëzoj ata që kanë bashkëpunuar për këtë reformë dhe veçanërisht shqiptarët, që e kanë mbështetur fort dhe ka qenë zëlartë në kërkesën për një gjyqësor të paanshëm dhe të pavarur.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
