Rama përdor Idrizin për të trembur Metën? Ja si përgjigjet kreu i PDIU

I ftuar në emisionin “Të Paekspozuarit”  në News24, kreu i Partisë për Drejtësi, Integrim dhe Unitet, Shpëtim Idrizi foli për krizën politike në të cilën vendi ndodhet dhe se çfarë pritet të ndodhë në vijim.

I pyetur nga gazetari Ylli Rakipi nëse Rama ju përdor për të trembur Metën dhe anasjelltas, Idrizi tha se PDIU ka peshën e vet në skenën politike tashmë.

“Mendoj dy gjëra. E para, PDIU ka peshën e vet në skenën politike shqiptare. Të garantoj që në zgjedhjet e ardhshme do dyfishojmë mandatet tona. Për shkak të peshës që kemi, dhe rolin që po luajmë në përpjekjen për t’u ulur në bisedime. Deduksioni i dytë, është fakti i gabuar që dikush mund ta përdorë PDIU-në, por kjo vjen si pasojë e kodit zgjedhor që kemi nga partitë e mëdha. Ju kujtoj se pas vitit 2005 ka ikur koha e partive shtojcë”, tha Idrizi.

Ndërkohë kreu i PDIU, Shpëtim Idrizi ka komentuar atë çka ndodhi në seancën e jashtëzakonshme plenare, të 11 prillit, ku u diskutua krijimi dhe përbërja e komisionit “ad hoc” për verifikimin e kandidatëve për institucionet e vettingut. Këto komisione do të verifikojnë kandidatët e institucioneve të rivlerësimit të gjyqtarëve dhe prokurorëve.

Deputetët e Kuvendit, pa opozitën miratuan kandidaturat e dy anëtarëve të PS-së Vasilika Hysi, Ulsi Manja, dhe atë të LSI-së, Luan Rama.

Por gjatë votimit, vetëm kreu i PDIU Shpëtim Idrizi nuk ka marrë votat e nevojshme për të qenë anëtar i komisionit “ad hoc” për vettingun.

Idrizi tha se artifica të kësaj natyre, si ajo e qëndrimit të mbajtur në Kuvend, duhet të shmangen, ndërsa theksoi se duhet t’i jepet rëndësia e duhur reformës në drejtësi.

Si e përceptoni ju atë që ndodhi në Kuvend?
Për gjëra kaq themelroe siç eshët reforma në drejtësi, artifica të tilla i bëjnë dëm procesit. Reforma në drejtësi është shumë e rëndësishme, dh zbatimi i vettingut nuk mund të fillonte me një gjë të tillë. Nuk ndaj opinionin që dy partitë e mëdha të kenë mazhorancës, pasi ata kanë përgjegjësinë për këtë sistem që ne po anatemojmë sot. Kreu i Parlamentit i kanë dërguar një letër të gjithë grupeve parlamentare për të paraqitur kandidaturën. Edhe ne paraqitëm kandidaturën tonë, nisur edhe nga fakti që mazhoranca jonë ka 3 grupe parlamentare. Emri i propozuar nga PDIU, ishte në kuadër të kësaj. Në Konferencën e Kryetarëve, u tha se PDIU meqë nuk është e përfaqësuar me ministër, trajtohet si minorancë. Por këtë nuk mund ta pranonim. Ne tashmë përfaqësohemi në kabinet qeveritar me zv.ministër. Megjithatë nuk ka rëndësi fakti i kësaj artifice. Në këto kushte doli ideja që të vazhdoja të garoja në pjesën e mazhorancës.

Si jua shpjeguan këtë?
Ne nuk pranuam. Edhe disa anëtarë të Konferencës së Kryetarëve nuk e pranuar këtë. Dhe me ngeli të garoja me Ulsi Manjën. Por theksoj se ne të gjithë duhet të kuptojmë se reforma në drejtësi është një proces shumë serioz.