Partia Demokratike ka reaguar pas vendimit të Gjykatës së Tiranës, që e dënoi me 60 orë punë në komunitet ish-kryebashkiakun e Kavajës, Elvis Roshi, për fshehje të dënimit në formularin e dekriminalizimit.
Demokratët e kanë cilësuar dënimin si një vendim qesharak, që tregon më së miri se kush e kontrollon sot sistemin e drejtësisë.
Përmes një reagimi zyrtar, selia blu ka mbajtur qëndrim të ashpër për dënimin e Rroshit, duke bërë përgjegjës kryeministrin Edi Rama.
“Vendimi i sotëm i prokurorisë dhe gjykatës për të lënë jashtë burgut mikun e Edi Ramës, ish-kryebashkiakun e Kavajës Elvis Rroshi, i shkarkuar si pasojë e ligjit të dekriminalizimit, është një provë e qartë se Edi Rama nuk e ka seriozisht procesin e dekriminalizimit dhe po tallet me atë proces jetik për vendin”, thuhet në reagimin e PD.
Kujtojmë se prokuroria kërkoi 7 muaj e 15 ditë burg, kërkesë e cila u pranua nga Rroshi, por iu ul një e treta e dënimit pasi pranoi akuzën dhe përfitoi gjykim të shkurtuar.
Elvis Roshi nuk ka kundërshtuar asnjë fakt të Prokurorisë, e cila e akuzoi për falsifikim të formularit të dekriminalizimit. Roshi, në cilësinë e kryetarit të Bashkisë së Kavajës ka falsifikuar formularin e dekriminalizimit, duke fshehur një dënim penal që kishte marrë në Itali për përdhunim, si dhe përdorimin e disa emrave të rremë.
Partia Demokratike deklaron se vetëm me largimin e Ramës si kryeminisër, “peshqit e mëdhenj do të bien në rrjetën e drejtësisë së pavarur”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
