PDIU kërkesë qeverisë që të heqë tarifën në Rrugën e Kombit: Duhet të jetë pa pagesë

Partia Drejtësi Integrim dhe Unitet ka reaguar pas vendimit të qeverisë për taksën e Rrugës së Kombit duke kërkuar heqjen e kësaj tarife.

Në një deklaratë për mediat, PDIU thotë se "ndjek me vëmendje dhe shqetësim situatën e krijuar pas vendimit të pakonsultuar e arrogant për vendosjen e një tarife të papërballueshme për “Rrugën e Kombit”.

PDIU i bën thirrje mazhorancës që të heqë tarifën prej 5 euro për autoveturat dhe 22 euro për kamionët në “Rrugën e Kombit”.

Sipas PDIU “Rruga e Kombit” nuk është biznes, por arteria kryesore që lidh dy pjesët e një kombi që padrejtësitë historike i ndanë, por që ne s’mund ti ndajmë akoma me politika të tilla. Ajo propozon që për rrugët kombëtare duhet të vendoset një tarifë e arsyeshme në përputhje me nivelin e të ardhurave të Shqiptarëve.

"Kjo tarifë do të godiste atë që kemi më shumë nevojë rritjen e shkëmbimeve tregtare me Kosovën, ku shkëmbimet e Shqipërisë me Kosovën janë rreth 140 milion euro në vit kurse të Kosovës me Serbinë janë mbi 460 milion euro në vit. Rruga e Kombit” dhe “Rruga e Arbërit” duhet të jenë pa pagesë", thuhet ndër të tjera në reagimin e PDIU.

Po ashtu PDIU shpreh mbështetjen dhe respektin për banorët e Kukësit që i dhanë leksion klasës politike Shqiptare dhe opinionit publik, sepse qytetarët kanë të drejtë të reagojne kur arroganca e kësaj maxhorance as nuk i pyet e as nuk i informon.

PDIU kërkon lirimin e 11 protestuesve nëpërmjet heqjes se intimidimit që maxhoranca po i ben Prokurorisë e Gjykatës, me rrethime Policore dhe urdhra politike.