Gjatë javës së ardhshme Maqedonia e Veriut dhe Kosova ka gjasa t’i hapin kufijtë me njëra tjetrën pa kushte. Paralajmërimin e kanë bërë homologët e shëndetësisë nga të dy shtetet, Venko Filipçe dhe Arben Zemaj.
“Anëtarët e grupeve punuese nga dy vendet tona do të punojnë në këmbimin e informatave për situatën epidemiologjike. Kjo do të na ndihmoj për të pasur një pasqyrë më të qartë rreth epidemisë dhe në bazë të kësaj do të vendosim edhe për regjimin e lëvizjes së lirë. Por për vendimin sa i përket hapjes së kufirit do të vendosim javën që vjen”, tha Venko Filipçe, ministër i Shëndetësisë.
Ministri i Shëndetësisë së Kosovës tha se me homologun e RMV-së kanë diskutuar shumë tema, por theksi kryesor është vënë tek situata epidemiologjike.
“Biseduam për shumë gjëra, situata epidemiologjike na mori pjesën më të madhe të kohës. Ju e dini që jemi në një kohë kur po hyjmë në përgatitjet e vitit të ri shkollor, i shkëmbyem këto përvoja, gjatë kësaj jave dhe javës tjetër do të kemi bisedime edhe për çështjen e kufijve", deklaroi Zemaj pas takimit me Venko Filipçe në Shkup.
Maqedonia dhe Kosova i kanë mbyllur kufijtë për njëra tjetrën për disa muaj, me një hapje të shkurtër e cila u pezullua për shkak të rritjes drastike të numrit të të infektuarve në të dy shtetet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
