“Dueli i heshtur” mes dy forcave të koalicionit qeverisës PS dhe LSI. PS nuk e pranon propozimin e LSI-së që koncesionet të miratohen në Parlament, ndërsa LSI i kthen monedhën duke bllokuar miratimin në Parlament të ligjit për vendosjen e kamerave të sigurisë në subjektet private.
Para disa muajsh Petrit Vasili, kreu i grupit parlamentar të LSI-së, depozitoi një projektligj që synonte vendosjen e kontrollit të Parlamentit në dhënien e koncesioneve. Kjo përbënte një thikë pas shpine nga aleati i PS-së, ndërkohë që akuzat e opozitës mbi abuzimet e qeverisë me këto koncesione kishte arritur kulmin. Drafti parashikon miratimin e partneriteteve publik-privat nga Kuvendi. Por deputetët e PS-së nuk e miratuan këtë nismë duke u shprehur se ekzistojnë mekanizmat e qeverisë për vlerësimin dhe kontrollin e këtyre koncesioneve.
Projektligji i dytë është për masat shtesë të sigurisë, ose konkretisht vendosja e kamerave në subjektet private. Ky projektligj është kthyer pas me dekret nga Presidenti Nishani, me arsyetimin se nuk janë marrë parasysh vërejtjet e PAMECA-s dhe nuk është në përputhje me standardet e BE-së.
Projektligji i qeverisë për vendosjen e kamerave të sigurisë në ambiente publike e private ku ka grumbullim njerëzish është kritikuar edhe nga ekspertët vendas sepse rrezikon të shkelë të drejtat e njeriut dhe privatësinë e qytetarëve. Drafti është kritikuar edhe nga deputetët të LSI-së përveç atyre të së djathtës. Mazhoranca e anuloi futjen në seancë të këtij projektligji sepse u konstatua mungesa e deputetëve, Në fakt, në dyshim ishte se si do të votonte LSI.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
