Kryetari i grupit parlamentar të Lëvizjes Socialiste për Integrim, Petrit Vasili, nënvizoi sot rolin e shoqërisë civile në monitorimin e zbatimit të ligjit për importin e mbetjeve.
Duke marrë fjalën në Kuvend, gjatë diskutimeve të ndryshimeve në ligjin “Për menaxhimin e integruar të mbetjeve”, Vasili theksoi se vendoset një standard i ri për përfaqësimin e shoqërisë civile, e cila do të jetë syri vëzhgues në këtë proces.
Sipas tij, “monitorimi nga ana e shoqërisë civile do i jepte përgjigje mosbesimit të krijuar për zbatimin e ligjit, i cili duhet të zbatohet ashtu siç është shkruar”.
“Problemi më i madh i shqiptarëve ka qenë zbatimi i ligjit dhe kjo është një sëmundje e rëndë që ka shoqëruar sistemin pluralist shqiptar në 25 vitet e fundit, ku kultura e zbatimit të ligjit ka rrënuar edhe inisiativa shumë të dobishme. Ligji për importin e mbetjeve është një inisiativë që ka një sensibilitet maksimal shoqëror dhe besoj që në rast se do të miratohej, një instrument i tillë (monitorimi nga shoqëria civile) do t’i jepte përgjigje të drejtpërdrejtë këtij mosbesimi të thellë. Ka ardhur momenti që përtej dyshimeve, shoqëria shqiptare të shikoj me sytë e saj se si do të funksionojë zbatimi i këtij ligji”, tha Vasili.
Ai garantoi se “qoftë edhe një fakt i vetëm, një devijim i vetëm apo një analizë e vetme e manipuluar, do të ishin motiv i mjaftueshëm për ta anulluar njëherë e përgjithmonë këtë ligj”.
“Ligji ka kufizimin vetëm në tre dogana të vendit. Asnjëra palë nuk zëvendëson tjetrën; shteti është i detyruar të bëjë detyrën, shoqëria civile mund ta monitorojë atë. Në rast se zbatimi i këtij ligji rezulton i kundërt me atë që shkruhet, mund t’i themi jo”, tha Vasili.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
