Zgjedhjet e 11 majit/ KQZ dhe Komisioneri i Informimit: Respektoni ligjin për të dhënat personale

Komisioneri për të Drejtën e Informimit dhe Mbrojtjen e të Dhënave Personale, Besnik Dervishi, dhe Komisioneri Shtetëror i Zgjedhjeve, Ilirjan Celibashi, kanë bërë apel për të garantuar respektimin e ligjit për të dhënat personale gjatë periudhës zgjedhore.

Ata kanë njoftuar qytetarët dhe të gjitha palët e angazhuara në zgjedhje se do të monitorohet me rigorozitet aktiviteti zgjedhor për të siguruar që të drejtat e shtetasve të respektohen në çdo hap.

Në këtë kuadër, ata kanë theksuar disa parime për përpunimin e të dhënave personale:

1. Çdo përpunim i të dhënave personale duhet të bazohet në kritere ligjore dhe të kuptueshme për qytetarët. Shtetasit duhet të informohen qartë për qëllimin e mbledhjes dhe përpunimit të të dhënave të tyre.
2. Partitë politike dhe organizatat përkatëse duhet të mbledhin dhe përpunojnë vetëm ato të dhëna që janë të nevojshme për regjistrimin e zgjedhësve.
3. Të dhënat duhet të mbrohen me masa të përshtatshme për të parandaluar qasjen e paautorizuar, shkatërrimin ose keqpërdorimin e tyre.
4. Të dhënat për regjistrim nuk duhet të përdoren për qëllime të tjera, si propaganda politike, pa pëlqimin e informuar të shtetasve.
5. Partitë dhe organizatat duhet të jenë të përgjegjshme për shkeljet e mbrojtjes së të dhënave dhe të jenë të hapura ndaj mbikëqyrjes nga autoritetet kompetente.

Zbatimi i këtyre parimeve ndihmon në forcimin e integritetit të zgjedhjeve dhe ruajtjen e besimit te proceset demokratike.

Qytetarët dhe subjektet zgjedhore mund të ankohen për shkelje të të dhënave personale pranë Zyrës së Komisionerit për të Drejtën e Informimit dhe Mbrojtjen e të Dhënave Personale.

Formulari i ankesës mund të plotësohet dhe dorëzohet në faqen zyrtare të Komisionerit.

Për më tepër informacion, Zyra e Komisionerit ka publikuar një udhëzues të veçantë për përpunimin e të dhënave personale në fushatën zgjedhore.